Ե՞րբ եք պաշտոնապես ճանաչելու Հայոց ցեղասպանությունը. Ազնավուրի անակնկալ հարցը՝ Իսրայելի նախագահին

Աշխարհահռչակ ֆրանսահայ շանսոնյե Շառլ Ազնավուրը Երկրորդ  համաշխարհային պատերազմի տարիներին հրեաներին ֆաշիստների հետապնդումից փրկելու համար Իսրայելում պարգևատրվել է Ռաուլ Վալենբերգի անվան մեդալով:

Ըստ Asbarez-ի՝ մեդալի հանձնման  հանդիսավոր արարողությունը տեղի է ունեցել Իսրայելի նախագահի նստավայրում:

Միջանկյալ նշենք, որ 93-ամյա շանսոնյեն պատրաստվում է համերգով հանդես գալ շաբաթ օրը Թել Ավիվում:

Ազնավուրին մեդալը շնորհել Իսրայելի նախագահ Ռեուվեն Ռիվլինը՝ առանձնապես շեշտելով, որ նրա հեղինակած իր ամենասիրած երգը «Լա Բոհեմ»-ն է:

«Պարգևը շնորհվել է Հոլոքոստի տարիներին Ազնավուրի ու նրա ընտանիքի մարդասիրական գործունեության, նացիստների կողմից հետապնդվող մի շարք անձանց թաքցնելու համար: Փրկարարական աշխատանքներում ակտիվ ներգրավվածություն են ունեցել Շառլն ու նրա քույրը՝ Աիդան»,- նշվել է այս կապակցությամբ նախագահականի տարածած հայտարարության մեջ:

«Իմ սիրելի՛ ընկեր, Ձեր ընտանիքը քաջության հիանալի օրինակ է: Հրեա ժողովուրդը երբեք չի մոռանա դա ու մշտապես երախտապարտ կլինի Ձեզ ու Ձեր ընտանիքին»,- ասել է Իսրայելի նախագահը:

Ի պատասխան՝ Ազնավուրն ասել է. «Մենք՝ հայերս և հրեաները, շատ ընդհանուր կետեր ունենք դժբախտության, ուրախության, աշխատանքի, երաժշտության, արվեստի, լեզուներ սովորելու ունակության, մեզ ընդունած երկրներում կարևոր մարդ դառնալու հարցերում»:

Մեդալը ստանալուց հետո Ազնավուրն անսպասելի հարց է ուղղել Իսրայելի նախագահին, թե ե՞րբ է Իսրայելը պաշտոնապես ճանաչելու Հայոց ցեղասպանությունը:

Ի պատասխան՝ Ռիվլինն ասել է, որ դա քաղաքական հարց է, որն ինքը բազմիցս բարձրացրել է Քնեսետում: