Պեկինը չի համաձայնել Թրամփի՝ Գոլանի բարձունքները պաշտոնապես Իսրայելի տարածք ճանաչելու որոշմանը

Պեկինը չի համաձայնել ԱՄՆ նախագահ Դոնալդ Թրամփի՝ Գոլանի բարձունքները պաշտոնապես Իսրայելի տարածք ճանաչելու որոշմանը։ Այս մասին լրագրողների հետ զրույցում ասել է Չինաստանի ԱԳՆ պաշտոնական ներկայացուցիչ Գեն Շուանը. հայտնում  է Lenta-ն՝ վկայակոչելով Huantsyu shibao-ին:

«Չինաստանը դեմ է ցանկացած միակողմանի գործողության, որը նենգափոխում է փաստերը, և չի ցանկանում նոր սրացում տարածաշրջանում»,- շեշտել է դիվանագետը` հավելելով, որ միջազգային հանրությունը Գոլանի բարձունքները համարում է բռնազավթված:

Չինաստանի ԱԳՆ խոսնակը նաև հիշատակել է ՄԱԿ-ի Անվտանգության խորհրդի բանաձևերը, ըստ որոնց` Իսրայելից պահանջվում է զորքերը դուրս բերել այդ տարածքներից։

Հիշեցնենք, որ ԱՄՆ նախագահ Դոնալդ Թրամփը երկուշաբթի ստորագրել էր Գոլանի բարձունքների նկատմամբ Իսրայելի ինքնիշխանությունը ճանաչելու մասին փաստաթուղթը: