Գերմանիայի Բունդեսթագում մոտ օրերս կքննարկվի Ցեղասպանությունը ճանաչելու հարցը

Գերմանիայում իշխող կուսակցությունների ներկայացուցիչները հանդես են եկել այն բանի օգտին, որ Օսմանյան կայսրությունում հայերի հանդեպ իրագործված հանցագործությունները որակվեն որպես ցեղասպանություն: Մոտ օրերս այս հարցը կքննարկի Բունդեսթագը:

Գերմանիայի ԱԳՆ ղեկավար Ֆրանկ Վալտեր Շտայնմայերը կանգնել է այն մարդկանց կողքին, ովքեր կոչ են անում ճանաչել Օսմանյան կայսրությունում հայերի զանգվածային սպանությունները որպես ցեղասպանություն: Այդ մասին նա հայտարարել է Süddeutsche Zeitung-ին տված հարցազրույցում. հայտնում է Deutsche Welle‎-ի ռուսական ծառայությունը: Նրա խոսքերով՝ ինքը լավ հասկանում է այն մարդկանց զգացմունքները, ովքեր պահանջում են Օսմանյան կայսրությունում հայերի հանդեպ հանցագործությունները որակել որպես ցեղասպանություն:

Միաժամանակ, Շտայնմայերն ասել է, որ գնալով ավելի սրվող քաղաքական բանավեճերն այս հարցի շուրջ կարող են ավելի բարդացնել կամ նույնիսկ անհնարին դարձնել Հայաստանի և Թուրքիայի միջև լուրջ, ուղիղ երկխոսության հնարավորությունը: