Էրդողանի աշխատավարձը 10.7 %-ով կբարձրանա և կկազմի ամսական 10550 դոլար

Թուրքիայի նախագահ Ռեջեփ Թայիփ Էրդողանի աշխատավարձը կբարձրանա 10.7 տոկոսով կամ 3776 թուրքական լիրայով (1019 դոլար): Ըստ թուրքական «Sozcu» թերթի կայքի՝ այս փոփոխությունը նախատեսված է 2018 թվականի նախագահականի բյուջեով:

Այսպիսով` 2018 թվականի հունվարից Էրդողանը 35295 լիրայի (9530 դոլարի) փոխարեն կստանա 39071 լիրա (10550 դոլար) մաքուր ամսական աշխատավարձ: Թուրքիայի նախագահի տարեկան աշխատավարձը կկազմի 468 852 լիրա (126 597դոլար).

Ինչպես տեղեկացնում է Ermenihaber-ը, կատարվելիք փոփոխության արդյունքում կբարձրանան նաև Թուրքիայի նախկին նախագահների կենսաթոշակները: Նախկին նախագահներ Աբդուլլահ Գյուլի և Ահմեթ Նեջդեթ Սեզերի մաքուր կենսաթոշակները կբարձրանան 2300 լիրայով (621 դոլար)՝ կազմելով ամսական 23 600 լիրա (6372 դոլար):

Նոր բյուջեի համաձայն՝ նախկին վարչապետերի կենսաթոշակները ներկայիս 15 973 լիրայից (4312 դոլար) կբարձրանա 17682  լիրայի (4774 դոլար):