Ո՞վ է ստանալու ամսական 6 միլիոն աշխատավարձը

Հայաստանի ազգային մրցունակության հիմնադրամի գործադիր տնօրեն Բեկոր Փափազյանը ազատվել է աշխատանքից` իր դիմումի համաձայն: Այս պաշտոնում նա այլեւս չի աշխատի հունիսի 15-ից:

«Այս որոշումը երկար քննարկումների արդյունք է: Հայաստանի ազգային մրցունակության հիմնադրամի հոգաբարձուների խորհուրդն իր 20-րդ նիստում հաստատեց, որ Բեկոր Փափազյանի կատարած աշխատանքը խիստ կարեւոր է եղել կառույցի հիմնադրման, զարգացման եւ ոլորտային ուղղությունների հստակեցման տեսանկյունից»,- նշված է հիմնարկի տարածած հաղորդագրության մեջ:

Մեր ունեցած տեղեկություններով` Բ. Փափազյանին մրցունակության հիմնադրամի տնօրենի պաշտոնում փոխարինելու է «Հայ փոստի» ներկայիս գլխավոր գործադիր տնօրեն Արման Խաչատուրյանը:

Հիշեցնենք, Բեկոր Փափազյանի անձի շուրջ ամիսներ առաջ մեծ աղմուկ բարձրացավ, երբ «Երկիր»-ը հրապարակեց նրա ամսական աշխատավարձի չափը` 6 միլիոն դրամ: