Ռասիստական հարձակումների պատճառով նվազել է Թուրքիայի հայկական վարժարանների աշակերտների թիվը

Թուրքիայում քրդամետ Ժողովուրդների դեմոկրատական կուսակցության հավատքի խորհրդի անդամ Մուրադ Մըհչըն հայտարարել է, որ ռասիստական հարձակումների պատճառով երկրի հայկական վարժարաններում նվազել է աշակերտների թիվը:

Ըստ Demokrathaber-ի՝ Մըհչըն նշել է, որ մարդիկ ապրում են վախի մթնոլորտում, և հանրաքվեից հետո շատացել է Հայաստան և Եվրոպա արտագաղթողների թիվը:

Նշվում է, որ, նախորդ տարիների համեմատ, մոտ 10 տոկոսով նվազել է հայկական վարժարանների աշակերտների թիվը: Քանի որ Թուրքիայի հայկական դպրոցները նույնպես ենթարկվում են երկրի կրթության նախարարությանը, թուրքերենի, սոցիալական և պատմության դասերը մատուցում են նախարարության կողմից նշանակված ուսուցիչները:

«Մինչ այդ դժվարություններն այլ հարթություններում են եղել: Նախկինում, օրինակ,  հայկական վարժարանում գրանցվելու համար պարտադիր պայման էր, որ երեխայի թե' հայրը, թե' մայրը լինեն հայ և պատկանեն այն դավանանքին, որն ընդունված էր դպրոցի կողմից: Այժմ պայմանները փոխվել են՝ բավարար է երեխայի ծնողներից միայն մեկի հայ լինելը: Պայմաններից կարող է լինել նաև երեխայի մկրտված լինելը»,- նշել է Մըհչըն:

Ըստ նրա` Թուրքիայում նախկինում եղել են հայկական բազմաթիվ վարժարաններ, իսկ այժմ դրանց թիվը չի գերազանցի ձեռքի մատների թիվը: