Թուրքիայից դեպի նորանկախ Քուրդիստան ավիաչվերթերը կդադարեցվեն

Հյուսիսային Իրաքի քրդական ինքնավարությունում անցկացված անկախության հանրաքվեից հետո Թուրքիան կդադարեցնի դեպի Քուրդիստանի Էրբիլ և Սուլեյմանիե քաղաքներ իրականացվող ավիաչվերթերը. տեղեկացնում է Ermenihaber-ը: Թուրքական «ntv.com.tr» լրատվակայքի համաձայն՝ այս մասին հայտնի է դարձել Էրբիլում Թուրքիայի գլխավոր հյուպատոսարանի հայտարարությունից։

«Իրաքի քաղավիացիայի վարչությունը 2017թ. սեպտեմբերի 29-ին՝ տեղական ժամանակով ժամը 18։00-ից կդադարեցնի դեպի Էրբիլի և Սուլեյմանիեի օդանավակայաններ ու այդ օդանավակայաններից կատարվող չվերթերը (բացառությամբ Իրաքի ավիաընկերությունների կողմից իրականացվող ներքին չվերթերի)։ Նման պայմաններում «Türk Havayolları», «AtlasGlobal»  և «Pegasus» ընկերությունների կողմից մեր երկրից դեպի Էրբիլ և Սուլեյմանիե և հակառակ ուղղությամբ կատարվող երկկողմ չվերթերը նշված ժամկետից հետո այլևս չեն կարող իրականացվել»,- ասված է հայտարարությունում։ 

Հյուպատոսարանը տեղեկացրել է նաև, որ իրենք աշխատանքներ են տանում մինչև սեպտեմբերի 29-ը կատարվելիք չվերթերի ծավալները մեծացնելու ուղղությամբ։