«Ազատ լսարան». քաղաքացիական հասարակություն կերտելու ճանապարհին մեզ պետք են գիտակից երիտասարդներ

Երեկ մեկնարկել է «Հրայր Մարուխեան» հիմնադրամի կողմից իրականացվող քաղաքական դասընթացների` «Ազատ լսարան» քաղաքագիտական ուսումնական ծրագիրը: 

Ծրագրի ղեկավար Իվան Աղազարյանը Yerkir.am-ի հետ զրույցում նշեց, որ դասընթացին մասնակցելու համար 49 մասնակից է ներառվել ծրագրում:

«Դասընթացների մեխն ակտիվ երիտասարդությանն ավելի մոտիկից ծանոթացնելն է Հայաստանի ներքին ու արտաքին խնդիրներին, ինչպես նաև Հայաստանի ապագայի շուրջ տեսլականին: Այսինքն` մեր նպատակը երիտասարդների, ովքեր հետաքրքրված են քաղաքականությամբ, քաղաքական գիտելիքները խորացնելն է: Դասընթացին մասնակցությունը երիտասարդներին գիտակցության բարելավում կտա. քաղաքացիական հասարակություն կերտելու ճանապարհին մեզ պետք են գիտակից երիտասարդներ, և մենք ուզում ենք նրանց գիտակցությանը, քաղաքական գիտելիքներին դրական տեղաշարժ ապահովել»,- ասաց Աղազարյանը:

Հարցին, թե դասընթացը շարունակական բնույթ կկրի՞, նա պատասխանեց, որ սա դասընթացի առաջին փուլն է, իսկ հունվար-փետրվար ամիսներին նախատեսում են կյանքի կոչել դասընթացների երկրորդ փուլը:

Դասընթացին մասնակցությունն, ի դեպ, անվճար է:

Ծրագիրը ներառում է ՝

1. Հայաստանի արդիական, քաղաքական խնդիրներին առնչվող դասախոսություններ:

2. Քննարկումներ բացահայտված խնդիրների վերաբերյալ, լուծումների առաջարկություններ:

Ծրագրի թեմաներն են՝

Հայաստանն արդի աշխարհում,

Պետականաշինության արդի խնդիրներն ու անելիքները,

Հայ քաղաքական միտքը հայության ապագայի շուրջ,

Հայկական սփյուռքը. անցյալ, ներկա և հեռանկարներ: