ՀՀ պետական լեզուն հայերենն է, «Լեզվի մասին» օրենքն էլ ենթակա չէ փոփոխման. ԿԳՆ-ն հերքում է տարածված լուրերը

Որոշ ԶԼՄ-ներ լուրեր են տարածում, թե ԿԳՆ-ն, հայերենից բացի, պետական լեզվի կարգավիճակ է տվել նաեւ ռուսերենին: Ըստ լուրերի` իբրև թե ավարտական դասարաններն ավարտածների ատեստատը ոչ միայն հայերենով է, այլ նաև ռուսերենով:

Yerkir.am-ը դիմեց ԿԳՆ` տեղեկանալու, թե որքանով են իրականությանը համապատասխանում լուրերը: Ի պատասխան ԿԳ նախարարի մամուլի խոսնակ Լուսինե Մարգարյանը նշեց, որ Հայաստանի Հանրապետության պետական լեզուն հայերենն է, լեզուն մեր անկախության հիմնարար արժեքներից մեկն է, և «Լեզվի մասին» օրենքը փոփոխության ենթակա չէ: «Անկեղծ ասած` ինձ համար անհասկանալի են սոցցանցերում ռուսերենին` իբր պետական կարգավիճակ տալու մասին անհիմն քննարկումները: Որևէ անհատ կամ լրատվամիջոց ՀՀ կրթության և գիտության նախարարության կողմից հայտարարություն անելուց առաջ դրա իրավական հիմքը, հաստատումը պետք է ունենա. ի՞նչ ասել է` «ՀՀ ԿԳ նախարարությունը ռուսերենին պետական կարգավիճակ է տվել», որ հետևողականորեն տարածվում է որոշ օգտատերերի կողմից: Որևէ մեկը չի կարող հաստատել տարածվող լուրերը մի պարզ պատճառով` նման բան չկա»,- ասաց Մարգարյանը:

Ըստ նրա` Հայաստանում նման հարց ուղղակի չի կարող գոյություն ունենալ, և սա պետք է մեկընդմիշտ արձանագրել: «ՀՀ պետական լեզուն հայերենն է, որն ամրագրված է ՀՀ Սահմանադրության մեջ: Կարծում եմ` սահմանադրական այս նորմը պատասխանն է բոլոր հարցերի»,- ասաց ԿԳՆ մամուլի խոսնակը: