Չեղարկվել է Լոս Անջելես-Թուրքիա գործարար համաժողովը

Լոս Անջելեսի առևտրի պալատը երկուշաբթի հայտարարել է մայիսի 25-ին կայանալիք Լոս Անջելես-Թուրքիա գործարար համաժողովի չեղարկման մասին:

Ըստ Asbarez-ի՝ Թուրքիայի ամենանշանավոր 12 ընկերությունների ղեկավարների և խորհրդի անդամների մասնակցությամբ կայանալիք կլոր սեղան-հանդիպումը պետք է նպաստեր Լոս Անջելեսի և Թուրքիայի միջև գործարար կապերի զարգացմանը, սակայն համաժողովը չեղարկվել է Վաշինգտոնում նախորդ շաբաթ Թուրքիայի նախագահ Ռեջեփ Թայիփ Էրդողանի թիկնապահների կողմից խաղաղ ցուցարարների վրա հարձակումից հետո Լոս Անջելեսի քաղաքային խորհրդի անդամ Փոլ Գրեգորյանի բարձրացրած մտահոգությունների պատճառով:

«Շնորհակալություն եմ հայտնում Լոս Անջելեսի պալատին իմ դիմումին արձագանքելու և Լոս Անջելես-Թուրքիա գործարար համաժողովը չեղարկելու համար: ԱՄՆ-ի խաղաղ քաղաքացիների վրա հարձակումը դատապարտելի է և մեր երկրի օրենքների կոպիտ խախտում է»,- ասել է Գրեգորյանը: