Մեղքի մեր բաժինն ընդունում եմ. ՊԵԿ նախագահը՝ ադրբեջանական խնձորի ներկրման մասին

Հայտնել ենք, որ Պետական եկամուտների կոմիտեի նախագահ Վարդան Հարությունյանն այսօր լրագրողների հետ հանդիպմանն ամփոփեց իր ղեկավարած գերատեսչության գործունեության կես տարին: Պատասխանելով ադրբեջանական խնձորի ներկրմանը վերաբերող հարցերին՝ նա ասաց, որ երևույթը գնահատում է «շատ վատ»:

Հարությունյանի խոսքով՝ ՊԵԿ-ի և ԱԱԾ-ի աշխատակիցների իրականացրած միջոցառումների արդյունքում բացահայտվել է՝ ովքեր են իրականացրել ապօրինի գործունեությունը` հիսուն կիլոգրամից ավելի խնձոր ներկրելը, սակայն, քանի որ գործը քննության փուլում է, չի կարող անուններ և տրամադրված կաշառքի չափ նշել: «Վարույթը գտնվում է Քննչական մարմնում»,- ասաց Հարությունյանը՝ հավելելով, որ իր ղեկավարած համակարգը մաքրման փուլում է, և այդ ընթացքում կարող են գտնվել մարդիկ, ովքեր «չեն հասկանում, որ մաքրվելու ժամանակն է»:

«Իհարկե, կան մարդիկ, ովքեր չեն հասկանում՝ մաքրվելու ժամանակն է և հանցանքներից պետք է զերծ մնալ: Ես այստեղ մեղքի մեր բաժինն ընդունում եմ, բայց մեղքի բաժին ունի ոչ միայն մաքսայինի կաշառվող աշխատակիցը, այլև կաշառողը, խանութի աշխատակիցը, որ վաճառում է ապրանքը»,- ասաց Հարությունյանը, ապա, արձագանքելով դիտարկմանը, թե լրատվամիջոցների բարձրացրած աղմուկից հետո միայն ՊԵԿ-ը հանդես եկավ համապատասխան հայտարարությամբ և սկսեց այդ ուղղությամբ աշխատանքներ կատարել, նշեց. «Էսքան դրականի մեջ գտել եք սև կետ ու ուզում եք սևացնել, խնդրեմ, կարող եք»:

ՊԵԿ նախագահը հավաստիացրեց նաև, որ հետևողական պայքար է մղելու կոռուպցիոն ռիսկերի դեմ և ամեն ինչ անելու է, որ նվազագույնի հասնեն նման երևույթները: