Դավիթ Լոքյանն այցելել է Արագածոտնի մարզ

ՀՀ տարածքային կառավարման և զարգացման նախարար Դավիթ Լոքյանն ապրիլի 26-ին  ՀՀ Արագածոտնի մարզ  կատարած աշխատանքային այցի շրջանակներում այցելել է Արտենի և Արագածավան համայնքներ, հանդիպումներ է ունեցել նշված համայնքի ղեկավարների հետ:

Արտենիում տեղի է ունեցել խորհրդակցություն համայնքային տարաբնույթ խնդիրների շուրջ: Նախարար Լոքյանը  գոհունակությամբ է փաստել, որ Արտենին զարգացման լավագույն ծրագրեր ներկայացրած  համայնքների շարքում է:

 Համայնքի ղեկավար Գեղամ Խլղաթյանը նախարարին է ներկայացրել  համայնքի ընթացիկ աշխատանքները, մասնավորապես, անդրադարձել  է «Արթին չրերի արտադրություն կոոպերատիվի» ընդլայնման ծրագրին, որի նպատակն է համայնքում զարգացնել գյուղատնտեսությունը, խթանել ձեռներեցությունը, բնակիչների համար ստեղծել բերքը մթերելու հնարավորություն:  Ծրագրով նախատեսվում է  ձեռք բերել  Էլեկտրական չորացման սարք, կորիզահան սարք, մուրաբաների պատրաստման հոսքագիծ: Ծրագրին հանգամանորեն ծանոթանալով՝ Դավիթ Լոքյանը ևս մեկ անգամ ընդգծել է, որ կառավարության նպատակն է նոր որակ հաղորդել տարածքային կառավարման եռաստիճան համակարգին՝ համայնք- մարզպետարան- կառավարություն համագործակցությանը:  

Արտենիում կայացած խորհդակցության ժամանակ համայնքի ղեկավարը  հարց է բարձրացրել խմելաջրի համակարգերը ՀՀ Էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեին հանձնելու և միասնական օպերատորի կողմից սպասարկվելու վերաբերյալ: Նշվել է, որ Արտենի համայնքում ոռոգման ջրի ցանցը գտնվում է ֆիզիկապես մաշված վիճակում, որի  շահագործումն անարդյունավետ է և ծախսատար: Ցանցի վերանորոգման դեպքում հնարավոր կլինի մշակել  շուրջ  600 հա  վարելահող:

Արագածավան համայնքում կայացած խորհրդակցության ժամանակ ևս անդրադարձ է եղել ջրի  հիմնախնդրին: Նախարար Դավիթ Լոքյանին տեղեկացրել են, որ մշակվող հողերը մեծամասամբ գերնորմատիվային  են, ուստի առավել մեծ ծավալի ջրօգտագործում են պահանջում: Հարկ է նշել, որ վերոնշյալ համայնքների ջրի հիմնախնդրի առնչությամբ Դավիթ Լոքյանն  արդեն  դիմել է  ՀՀ ջրային տնտեսության պետական կոմիտեի նախագահ Արսեն  Հարությունյանին ՝ Արագածավան համայնքում ոռոգման ջրի սակագնի նվազեցման հնարավորությունը, ինչպես նաև  Արտենի համայնքի ոռոգման ցանցի վերանորոգման հարցերը քննարկելու նպատակով:  

Դավիթ Լոքյանը այցելել է նաև համայնքներում գործող նախադպրոցական հաստատություններ: Նախարարը գոհունակություն է հայտնել հատկապես Արագածավանի մանկապարտեզի հետ կապված, նկատել, որ կազմակերպչական և դաստիարակչական լավ փորձը  կարող է օրինակելի լինեն նաև այլ համայնքների համար:  Արագածավան համայնքում քննարկվել է նաև Արագածավան խոշորացվող համայնքին վերաբերող խնդիրներ: 

ՀՀ տարածքային կառավարման և զարգացման նախարարություն