Հանձնարարական անտառների կառավարման և ապօրինի անտառահատումների վերաբերյալ

Կառավարության նիստի օրակարգին անցնելուց առաջ վարչապետ Կարեն Կարապետյանը հանձնարարական տվեց անտառների կառավարման և ապօրինի անտառահատումների վերաբերյալ: Նա նշեց, որ այդ թեմայով երեկ անցկացվել է խորհրդակցություն, քանի որ վերջին ժամանակներս հաճախ են բարձրաձայնվում մտահոգություններ ապօրինի անտառահատումների վերաբերյալ:

«Անհրաժեշտ է կատարելագործել անտառների կառավարման ներկա մոդելը և համապատասխանեցնել կառավարման ժամանակակից պահանջներին: Այս պահին կառավարման ներկա մակարդակը գնահատում են անբավարար»,- ասաց վարչապետը:

Նա հանձնարարեց գյուղատնտեսության նախարարին` ախտորոշել անտառների պահպանության բնագավառում առկա խնդիրները, անտառների վերականգման ուղիները, ներկայացնել ժամանակակից կառավարման մեթոդների ու գործիքների մասին առաջարկություններ, սերտ համագործակցելով բնապահպանական տեսչական մարմինների հետ` ներկայացնել ապօրինի անտառահատումների դեմ պայքարի միջոցառումների ծրագիր:

Բնապահպանական տեսչական մարմնի պետին հանձնարարվեց ուսումնասիրել վերջին երեք ամիսներին մամուլում, սոցիալական ցանցերում բնապահպանական խնդիրների վերաբերյալ հրապարակումները և ներկայացնել հաշվետվություն: