Անտառների պահպանման ու կառավարման ոլորտում մի շարք բարեփոխումներ կիրականացվեն

Կառավարության նիստից հետո բնապահպանության նախարար Արծվիկ Մինասյանը լրագրողների հետ ճեպազրույցում անդրադարձավ անտառային բարեփոխումների շրջանակներում իրականացվող աշխատանքներին:

ՀՀ նախագահի հրամանագրով` ստեղծվել է Անտառային կոմիտե, այսօր էլ կառավարության նիստում հաստատվեց Անտառային կոմիտեի կանոնադրությունը և կառուցվածքը:

Մեկ այլ որոշմամբ` բնապահպանության նախարարությունում ձևավորվում է կենսառեսուրսների և անտառային քաղաքականության վարչություն: «Հայանտառ» ՊՈԱԿ-ի կառավարման իրավասությունը փոխանցվում է Անտառային կոմիտեին: «Հայանտառ»-ը կիրականացնի անտառների տնտեսավարումը` «Անտառների պահպանումից` զարգացում» հայեցակարգի որդեգրմամբ:

Կստեղծվի նաև անտառային պահպանության ծառայություն, որի հիմնական նպատակը պարեկապահակային ծառայություն ձևավորելն է: Այն կաշխատի շուրջօրյա` հատուկ ծառայության կարգավիճակով, կունենա վարչական միջոցներ գործադրելու իրավասություն` արգելելու և կանխարգելելու ապօրինի ծառահատումները, որսը: