Երկու տեսչությունների լուծարումից հետո կստեղծվի մեկ` բնապահպանական նախարարության տեսչական մարմին

Կառավարության վաղվա նիստի օրակարգում  ներառված է ՀՀ  բնապահպանության նախարարության բնապահպանության և ընդերքի տեսչական մարմին ստեղծելու, տեսչական մարմնի կանոնադրությունը և կառուցվածքը հաստատելու, և կառավարության մի շարք որոշումներում փոփոխություններ անելու մասին հարցը:

Ըստ հիմնավորման, կառավարությունը ստանձնել է երկրում տեսչական բարեփոխումների իրականացումը, որի նպատակն է առավել արդյունավետ տեսչական համակարգի հիմնումը և դրանով իսկ գործարար միջավայրի համար բարենպաստ պայմանների ստեղծումը: Անհրաժեշտություն է առաջացել լուծարել ՀՀ բնապահպանության նախարարության աշխատակազմի բնապահպանական պետական տեսչությունը և ՀՀ էներգետիկ ենթակառուցվածքների և բնական պաշարների նախարարության ընդերքի պետական տեսչությունը և օրենքին համապատասխան ստեղծել Հայաստանի Հանրապետության բնապահպանության նախարարության բնապահպանության և ընդերքի տեսչական մարմինը: Երկու տեսչությունների լուծարումից հետո մեկ տեսչական մարմնի ստեղծումը պայմանավորված է.

- ներկայում մի շարք դեպքերում առկա են նշված երկու տեսչությունների գործառույթների կրկնորդումներ .

- ընդերքի պետական տեսչության հիմնական նպատակներից է ընդերքօգտագործման հետևանքով ընդերքի վրա վնասակար ներգործությունների կանխարգելմանն ու նվազեցմանը նպաստելը: Բնապահպանական  վերահսկողության մասին ՀՀ օրենքի 4-րդ հոդվածի 1-ին պարբերության համաձայն բնապահպանական վերահսկողությունն իր մեջ ներառում է նաև ընդերքօգտագործման ընթացքում շրջակա միջավայրի վրա ազդեցության նկատմամբ վերահսկողությունը: Այս բոլոր գործառույթները մինչև Ընդերքի պետական տեսչության ստեղծումն իրականացրել է Բնապահպանության պետական տեսչությունը, և ըստ էության 1-ին հերթին ենթադրում է բնապահպանական վերահսկողություն:

Նորաստեղծ տեսչական մարմնում կներդրվի կոլեգիալ կառավարման նոր համակարգ: Մարմնի գործունեության թափանցիկության ապահովման համար կձևավորվեն պետական և մասնավոր հատվածի ներկայացուցիչներից բաղկացած կառավարման խորհուրդ, որի լիազորությունները կսահմանափակվեն հիմնականում ռազմավարական խնդիրների ու դրանց իրագործմանն ուղղված նպատակների սահմանմամբ և  որոշումների կայացմամբ՝ ստուգումների տարեկան ծրագրերի, հաշվետվությունների, ստուգումների ուղեցույցների հաստատում, ռազմավարական խնդիրների իրագործմանն ուղղված տեսչական մարմնի գործունեության նպատակների սահմանում, կատարողականի ցուցանիշների սահմանում և կառավարում: