ԿԳՆ տեսչական մարմին կստեղծվի. ի՞նչ խնդիրներ կլուծի այն

ՀՀ կառավարության այսօրվա նիստի օրակարգում հաստատվեց ԿԳ նախարար Լևոն Մկրտչյանի կողմից ներկայացված` կրթության եւ գիտության նախարարության կրթության տեսչական մարմին ստեղծելու հարցը:

Նորաստեղծ տեսչական մարմինը կփոխարինի լուծարված` կրթության պետական տեսչությանն ու հիմնականում կիրականացնի կրթության պետական տեսչության կողմից ներկայումս իրականացվող գործառույթները: Բացի այդ` այն իրականում վերահսկողական գործառույթներ կունենա կրթության զարգացման պետական ծրագրի իրականացման, պետական կրթական չափորոշիչների կիրառման, կրթության իրավունքի, կրթական համակարգի սոցիալական երաշխիքների, կրթության որակի բարձրացման և կրթական ծրագրերի յուրացման ապահովման նկատմամբ:

Տեսչական մարմինը կկառավարի կառույցի կառավարման խորհուրդը, որը բաղկացած կլինի 9 անդամից, որոնք կներկայացնեն տարբեր գերատեսչություններ: Իսկ կառույցի ղեկավարին նշանակելու է վարչապետը:

Հիշեցնենք, որ ավելի վաղ, վարչապետ Կարեն Կարապետյանի գլխավորությամբ, կառավարությունում տեղի էր ունեցել տեսչական բարեփոխումների համակարգման խորհրդի հերթական նիստը, որի ժամանակ էլ որոշվել էր կրթության տեսչության փոխարեն ստեղծել ավելի բարձր կարգավիճակ ունեցող մարմին: