Թուրքական դատարանը սահմանել է երկրի բանակում ապրիլի 24-ին սպանված հայ զինվորի ընտանիքին վճարվելիք հատուցման չափը

Հայոց ցեղասպանության 96-րդ տարելիցին՝ 2011 թվականի ապրիլի 24-ին, թուրքական բանակում հայ զինվոր Սևակ Շահին Բալըքչըի սպանության գործով թուրքական դատարանը որոշում է կայացրել:

Ըստ Demokrathaber-ի՝ դատարանը որոշել է, որպես բարոյական փոխհատուցում, Բալըքչը ընտանիքին վճարել 40.000 թուրքական լիրա (մոտ 11.000 ԱՄՆ դոլար):

Դատարանի որոշմամբ` Սևակ Բալըքչըի ծնողներին՝ Անի և Կարպիս Բալըքչըներին, 16.000-ական, իսկ Սևակի քրոջը՝ Լեռնա Օզդերին, 8.000 թուրքական լիրա կվճարվի:

Պոլսում լույս տեսնող հայկական «Ակօս»-ը փոխհատուցման այս չափը «ծիծաղելի» է որակել, իսկ Բալըքչը ընտանիքի փաստաբան Իսմայիլ Ջեմ Հալավուրթը բողոքարկման է ենթարկել վճիռը:

Հիշեցնենք, որ Սևակ Բալըքչըն սպանվել է Թուրքիայի Բաթմանի Քոզլուք շրջանում պարտադիր զինվորական ծառայությունն իրականացնելիս: Թուրքական իշխանությունները մինչ օրս պնդում են, թե բանակում Սևակի մահը դժբախտ պատահարի հետևանք է, սակայն Սևակի ծնողները համոզված են` նրա հետ պատահածն ազգային հողի վրա կատարված սպանություն է: