Հայ ձյուդոյիստները մեդալ են նվաճել Եվրոպայի գավաթի խաղարկությունում

Ձյուդոյի Հայաստանի մեծահասակների հավաքականն ապրիլի 1-2-ը Խորվաթիայի Դուբրովնիկ քաղաքում մասնակցեց Եվրոպայի գավաթի խաղարկությանը:

ՀԱՕԿ լրատվականի հետ զրույցում Հայաստանի ձյուդոյի ֆեդերացիայի փոխնախագահ Դավիթ Խիթարյանը հայտնել է, որ մեր մարզիկները մեկական արծաթե եւ բրոնզե մեդալ են նվաճել: Սոսե Բալասանյանը դարձել է արծաթե մեդալակիր, իսկ Ֆերդինանդ Կարապետյանն արժանացել է բրոնզի:

Հայաստանը ներկայացնում էին Գոռ Մկրտչյանը (60 կգ քաշային կարգ), Ֆերդինանդ Կարապետյանը (73 կգ) և Սոսե Բալասանյանը (52 կգ):

Հավաքականն ապրիլի 8-16-ն ուսումնամարզական հավաք կանցկացնի Սոչիում: Այնուհետեւ հավաքականը մեկնելու է Վարշավա` ապրիլի 20-23-ը մասնակցելու Եվրոպայի առաջնությանը: Թիմի կազմը դեռեւս պարզ չէ: