Արմեն Ռուստամյանի վարկանիշը Նիկոլ Փաշինյանի վարկանիշից բարձր է. Gallup

Այսօր լրագրողների հետ հանդիպման ժամանակ Հայկական սոցիոլոգիական ասոցիացիայի նախագահ Գևորգ Պողոսյանը ներկայացրել է Baltic Surveys/The Gallup Organization մասնագիտացված կազմակերպությունների անցկացրած սոցհարցման արդյունքները: Ըստ այդմ` Գագիկ Ծառուկյանը վարկանիշով առաջատար է` ունի 73 տոկոս վարկանիշ: Նրան մեկ տոկոսով զիջում է վարչապետ Կարեն Կարապետյանը` 72 տոկոս: Երրորդ տեղում պաշտպանության նախարար Վիգեն Սարգսյանն է` 40 տոկոս վարկանիշ: Չորրորդ տեղում ՀՀ նախագահ Սերժ Սարգսյանն  է` 39 տոկոս:

Նրան հավասար արդյունք` աննշան տարբերությամբ,  ունի պաշտպանության նախկին նախարար Սեյրան Օհանյանը: Նրան հաջորդում է  «Ելք» դաշինքի ցուցակն առաջնորդող Էդմոն Մարուքյանը` 37 տոկոս: Էդմոն Մարուքյանին հավասար ցուցանիշ ունի ՀՀ երկրորդ նախագահ Ռոբերտ Քոչարյանը: Հաջորդը «Ժառանգության» առաջնորդ Րաֆֆի Հովհաննիսյանն է` 36 տոկոս, նախկին վարչապետ Հրանտ Բագրատյանի վարկանիշը 35 տոկոս է: 

Ըստ ցուցակի` ՀՅԴ համամասնական ցուցակը գլխավորող Արմեն Ռուստամյանին` 35 տոկոս վարկանիշով, հաջորդում է «Ելք» դաշինքի ներկայացուցիչ Նիկոլ Փաշինյանը` 34 տոկոս վարկանիշով: 

Ցուցակի վերջին երեք գործիչներն են Վարդան Օսկանյանը` 33 տոկոս, ՀՎԿ առաջնորդ Արթուր Բաղդասարյանը` 25 տոկոս, ՀՀ առաջին նախագահ Լևոն Տեր-Պետրոսյանը` 21 տոկոս վարկանիշով: