Լիզինգի պետական աջակցության ծրագիրը հաստատվեց

Կառավարության նիստում  գյուղատնտեսության նախարար Իգնատի Առաքելյանը հաստատման ներկայացրեց հանրապետությունում գյուղատնտեսական տեխնիկայի ֆինանսական վարձակալության՝ լիզինգի պետական աջակցության ծրագրին հավանություն տալու մասին որոշման նախագիծը:

Ըստ նախագծի՝ հանրապետությունում շահագործվող գյուղատնտեսական տեխնիկայի շուրջ 90%-ն օգտագործվում է 20 տարուց ավելի և անցել է ամորտիզացիայի համար սահմանված ժամկետները: Գյուղատնտեսական տեխնիկայի մաշվածության հետևանքով կտրուկ ավելանում է նորոգումների և տեխնիկական սպասարկումների ծախսը, որպես հետևանք` բարձրանում են նաև ծառայությունների սակագները:

Գյուղատնտեսական արտադրությունն անհրաժեշտ չափով բավարարված չէ տեխնիկական միջոցներով` ինչպես քանակական, առավել ևս` որակական առումով: Հանրապետությունում առկա գյուղատնտեսական տեխնիկայի վիճակի վերլուծությունը ցույց է տվել, որ տեխնիկական միջոցների միջին սարքինության մակարդակը կազմում է շուրջ 79.0 %:

Գյուղատնտեսական տեխնիկայի հավաքակայանը գործունակ պահելու համար անհրաժեշտ է այն թարմացնել տարեկան 10.0 - 12.5 տոկոսի չափով, մինչդեռ` 1992 թվականից ի վեր ներկրված սակավաթիվ տարատեսակ տեխնիկական միջոցները լիարժեք չեն ապահովել հավաքակազմի նորացումը:

ՀՀ վարչապետ Կարեն Կարապետյանը նշեց, որ գյուղատնտեսության նախարարությունն աշխատում է, որպեսզի առավելագույնս ժամանակակից պայմաններ ստեղծի  գյուղատնտեսության զարգացման համար:

 «Մենք պետք է հստակ հասկանանք և իմանանք, որ եթե մենք գյուղատնտեսության մեջ տեխնոլոգիաների, գյուղմեխանիզացիայի և այլ խնդիրներ չլուծենք, մենք այնտեղ ռեալ դրական արդյունքներ չենք ունենալու: Հստակ հասկանում ենք, թե ոնց ենք անում, և երկրորդը` 2,2 միլիարդով չենք սահմանափակվում, եթե լիզինգի հնարավոր գումարները ցանկացողների թիվը շատ լինի, մենք անպայման ռեսուրս կգտնենք»,- ասաց նա:

Վարչապետը հանձնարարեց գյուղնախարարին` լինել առավելագույնս ուշադիր: Նրա խոսքով` ներկայացվող որոշումն ընդունելուց հետո անգամ չպետք է հանգստանալ և թողնել ինքնահոսի, այլ մարզպետները, գյուղնախարարությունը պետք է համայնքներում զբաղվեն իրազեկման բարձրացմամբ` ուղեկցելով գործարք արած գյուղատնտեսին:

Ըստ նախագծի` ծրագրի իրականացման արդյունքում նախադրյալներ կստեղծվեն մատչելի մեխանիզմների կիրառմամբ գյուղատնտեսությունում տնտեսավարողների վճարունակ պահանջարկի բավարարման` գյուղատնտեսական տեխնիկայի հավաքակազմի որոշակի նորացման համար: Ծրագրի իրականացումը հնարավորություն կտա նորացնելու հանրապետության գյուղատնտեսական տեխնիկայի հավաքակազմի շուրջ 1.0-2.0 տոկոսը, սակայն նաև նախադրյալներ կստեղծի առաջիկա տարիներին մատչելի մեխանիզմների կիրառմամբ իրականացնել տեխնիկայի համալրման առավել ընդգրկուն ծրագրեր, որոշակիորեն կբարձրանա գյուղատնտեսությունում մեքենայացման մակարդակը, տնտեսապես կամրապնդվեն շահառու գյուղացիական տնտեսությունները և պայմաններ կստեղծվեն վերջիններիս կողմից ապրանքային արտադրության կազմակերպման և հետագա զարգացման համար: