Սպառած գազի չափաքանակը կարող է ներառվել ընտանիքի անապահովության բնութագրիչների շարքում

Կառավարության վաղվա նիստի օրակարգում աշխատանքի և սոցիալական հարցերի նախարարությունը ներառել է որոշման փոփոխություն,  որը վերաբերում է  կառավարության հանձնարարականին, ըստ որի`  կառավարություն պետք է ներկայացվի առաջարկու­թյուն գազի և էլեկտրաէներգիայի սակագնային քաղաքականության վերանայման վերաբերյալ: Մասնավորապես, առավելագույնս նվազեցնել սոցիալապես անապահով ընտանիքների համար սահման­ված սակագինը՝ այլ սպառողների հաշվին:

Ի կատարումն «Պետական նպաստների մասին» օրենքի, յուրաքանչյուր տարի իրականացվող տնային տնտեսությունների կենսապայմանների ամբողջացված ընտրանքային հետազոտության արդյունքներով ներկայացվող առաջարկությունների հիման վրա մշակվում են ընտանիքի անապահովության բնութագրիչների թիրախային ցուցանիշները: Կառավարության 2014թվականի որոշմամբ արդեն իսկ սահմանված է ընտանիքների անապահովության գնահատման ժամանակ ընտանիքի սպառած էլեկտրաէներգիայի քանակի հանգամանքի կիրառումը: Ընտանիքի անապահովության գնահատման ժամանակ հաշվի չի առնվում ընտանիքի կողմից սպառած բնական գազի չափաքանակը:

Որոշման փոփոխությամբ նախատեսվում է կատարելագործել և հստակեցնել ընտանեկան, սոցիալական նպաստների և հրատապ օգնության նշանակման և վճարման գործընթացի հետ կապված հարաբերությունները, ինչպես նաև մեծացնել դրանց հասցեականությունը:

Քանի որ ընտանիքի կողմից տարվա ընթացքում սպառած բնական գազի չափաքանակը կարող է կիրառվել որպես ընտանիքի անապահովության գնահատման ցուցանիշ, որոշման նախագծով առաջարկվում է այն ներառել ընտանիքի անապահովության բնութագրիչների շարքում: Միաժամանակ, հաշվի առնելով Հայաստանի բնակլիմայական պայմանները և տարբեր եղանակների ընթացքում ընտանիքների կողմից բնական գազի սպառման տարբեր քանակը (բնակարանի ջեռուցման համար), առաջարկվում է 2017 թվականի ընթացքում իրականացնել ընտանիքների անապահովության գնահատման համակարգում` ընտանիքի uպառած բնական գազի սահմանային չափաքանակի կիրառման փորձնական ծրագիր: Նշված ծրագրի արդյունքների ամփոփելուց հետո հնարավոր կլինի ՀՀ կառավարությանը ներկայացնել առաջարկություն բնական գազի սպառման տարեկան (12 ամիսների) սահմանային չափաքանակի մասին, որն ավելի ճշգրտորեն կբնորոշի ընտանիքի կենսապայմանները: