Եթե զինգրքույկներում անփութություն են ցուցաբերել, ուրեմն պետք է ենթարկվեն պատասխանատվության. ՄԻՊ

Այսօր լրագրողների հետ զրույցում ՀՀ ՄԻՊ Արման Թաթոյանն անդրադարձավ օրեր առաջ աղմուկ հանած` զինգրքույկների խնդրին: Հիշեցնենք, որ մարտական գործողությունների մասնակցած որոշ զինծառայողների գրքույկներում անվավեր են ճանաչվել նախկինում արված գրառումներն առ այն, որ նրանք մասնակցել են մարտական գործողությունների:

Արման Թաթոյանը նախ նշեց, որ առաջացած խնդրում օրենսդրական հստակեցումների անհրաժեշտություն է տեսնում: ըստ նրա` նախքան գնահատական տալը, ինքը պարտավոր է պարզաբանում պահանջել համապատասխան կառույցից: Մինչ այդ, ուսումնասիրելով այդ թեմայով հրապարակումները, սկսել է սեփական նախաձեռնությամբ ուսումնասիրել խնդիրը և իր մոտ է հրավիրել նման խնդիր ունեցող զինծառայողների ծնողներին և որոշ ՀԿ-ների ներկայացուցիչների:

Հարցին, թե ինչպե՞ս կմեկնաբանի պաշտոնական այն հայտարարությունը, թե զինծառայողների գրքույկում արված` անվավեր ճանաչելու գրառումները եղել են անփութության հետևանք, Արման Թաթոյանը նշեց, որ եթե դա հրապարակային պաշտոնական հայտարարություն է, անփութություն ցուցաբերած անձինք պետք է ենթարկվեն պատասխանատվության: