Հակառակորդներ ենք, թշնամիներ չենք. Մուշեղ Պետոյանը՝ Արթիկի քաղաքապետի հետ փոխհարաբերությունների մասին

ԱԺ ՀՀԿ խմբակցության պատգամավոր Մուշեղ Պետոյանը Yerkir.am-ի հետ զրույցում, ի պատասխան Արթիկում ՀՀԿ ռեյտինգային ցուցակով իր առաջադրվելու մասին լուրերին,  նշեց, որ դեռ պարզություն չկա:  

Մեր ճշտող հարցին` ներկա պահին առաջարկ կա՞ ՀՀԿ-ի կողմից, որ Արթիկում նրանց ռեյտինգային ցուցակով առաջադրվի, պատգամավորն արձագանքեց. «Առաջարկ չէ, բայց խոսակցություն ունեցել ենք Հանրապետական կուսակցության ղեկավարության հետ, բայց դեռ պարզ չէ, որևէ հստակ բան չկա այս պահի դրությամբ, որ ասեմ: Հենց լինի, կասեմ»:

Պետոյանը նշեց, որ հիմա քննարկումների մեջ են, առաջիկա մի քանի օրերի ընթացքում ամեն ինչ պարզ կլինի:

Նրանից փորձեցինք ճշտել` արդյո՞ք իրականությանը համապատասխանում են այն լուրերը, որ նա և Արթիկի քաղաքապետ Մխիթար Վարագյանը թշնամիներ են, և նրանց փորձել են հաշտեցնել, բայց չի ստացվել: Պետոյանը պատասխանեց, որ իրենք թշնամիներ չեն, ապա հավելեց. «Մենք քաղաքական պրոցեսներում հակառակորդներ ենք, բայց թշնամիներ չենք: Մենք հաշտեցնողներ չենք տեսել, այսինքն` փորձեր չեն եղել, կամ` ի՞նչ կա հաշտեցնելու, եթե մենք քաղաքականության մեջ հակառակորդներ ենք: Իսկ  թե նա կառաջադրվի՞, թե՞ չի առաջադրվի, պարզ չէ»:

Նշենք, որ, ըստ մամուլում շրջանառվող լուրերի, Արթիկում ՀՀԿ ռեյտինգային ցուցակով առաջադրվելու է ԱԺ պատգամավոր Մուշեղ Պետոյանը, իսկ Արթիկի քաղաքապետ Մխիթար Վարագյանը, ով նույնպես ներկայացնում է  Հանրապետական կուսակցությունը, կարող է խոչընդոտել Պետոյանի ընտրվելուն: Նշվում է նաև, որ Պետոյանն ու Վարագյանը թշնամիներ են:

ՀՀԿ-ում կատարվող իրադարձությունների մասին Պետոյանը խուսափեց կարծիք հայտնել` նշելով, թե ինքը կուսակցական չէ և չի ցանկանա որևէ մեկնաբանություն անել: