Ավստրալիայի Հայ Դատի հանձնախումբը շնորհավորել է Գլեդիս Բերեջիքլյանին

Ավստրալիայի Հայ Դատի հանձնախումբը հայ համայնքի անունից շնորհավորել է հանձնախմբի անդամ Գլեդիս Բերեջիքլյանին՝  Նոր Հարավային Ուելս նահանգի վարչապետ ընտրվելու առիթով:

Նահանգի «Ազատական» կուսակցությունը ներկայացնող Բերեջիքլյանը միաձայն վարչապետ է ընտրվել հունվարի 22-ին կայացած ժողովում:

Բերեջիքլյանը 2013 թվականին ընտրվել է Նոր Հարավային Ուելսի նահանգի խորհրդարանի անդամ՝ որպես հայաշատ նահանգի ներկայացուցիչ:

Ավստրալիայի Հայ Դատի հանձնախմբի վարիչ տնօրեն Վաչե Գահրամանյանը հայտարարել է,-«համայնքը հպարտ է Գլեդիս Բերեջիքլյանի արձանագրած հաջողություններով: Այս հաջողությունը վկայում է, որ 2003 թվականից ի վեր Գլեդիսի տարած աշխատանքը գնահատվել է ոչ միայն մեր համայնքի, այլ ամբողջ նահանգի կողմից»:

Ավստրալիայի Հայ Դատի հանձնախումբը նաև շնորհավորել է նախկին վարչապետ Մայք Բեյրդին՝  պաշտոնավարության վերջին 3 տարիների ընթացքում տարած աշխատանքի համար: