Ավստրալիայի Հարավային Ուելս նահանգի վարչապետ Գլեդիս Բերեջիկլյանը հայտնել է սահմանափակումները թուլացնելու մասին

Ավստրալիայի Նոր Հարավային Ուելս խոշորագույն նահանգում, որի մայրաքաղաքն է Սիդնեյը, մայիսի 15-ից կթուլացնվեն կորոնավիրուսի պանդեմիայի կապակցությամբ ընդունված սահմանափակումները. այս մասին հայտարարել է նահանգի վարչապետ Գլեդիս Բերեջիկլյանը, հայտնում է Reuters լրատվական գործակալությունը։ 

Բերեջիկլյանի խոսքով՝ ուրբաթ կբացվեն ռեստորանները, խաղահրապարակները և հանրային լողավազանները, քանի որ նահանգում կորոնավիրուսի տարածումը կտրուկ կրճատվել է։ Բացի այդ, կթույլատրվեն մինչև 10 հոգանոց հավաքները.  «Միայն այն, որ մենք թուլացնում ենք սահմանափակումները, չի նշանակում, որ վիրուսը դարձել է պակաս մահաբեր կամ պակաս սպառնալիք է ներկայացնում։ Դա նշանակում է, որ մենք ամեն ինչ լավ ենք արել»,- հստակեցրել է նա։

Հիշեցնենք՝  Նոր Հարավային Ուելս նահանգն ամենաշատն է տուժել Ավստրալիայում համավարակի հետևանքով. երկրում վարակման մահվան դեպքերի շուրջ 45%-ը գրանցվել է հենց այստեղ։