Իտալական քաղաքը դատի կտա Charlie Hebdo-ին՝ աղետի վերաբերյալ ծաղրանկարի համար

Իտալական Ֆարինդոլա քաղաքի իշխանությունները դատական հայց կներկայացնեն ֆրանսիական Charlie Hebdo երգիծական շաբաթաթերթի դեմ. այս մասին հաղորդում է РИА Новости-ն:

Աղբյուրը մանրամասնում է, որ պատճառը Charlie Hebdo-ի հրապարակած ծաղրանկարն է: Պարբերականը ծաղրանկար է հրապարակել, որը վերաբերում է հունվարի 18-ին Իտալիայում տեղի ունեցած բնական աղետին. Աբրուցո նահանգի լեռնային շրջանում ձնահոսքի տակ է հայտնվել հյուրանոցը, ինչի հետևանքով զոհեր և անհետ կորածներ կան:Շ

Ծաղրանկարում պատկերված է մահը, որը դահուկներով իջնում է լեռից`դահուկի փայտերի փոխարեն երկու գերանդի բռնած: Նկարի վրա արված է «Իտալիա: Ձյուն է գալիս» գրությունը:

Ֆարինդոլայի քաղաքապետ Իլարիո Լակետան հայտնել է, որ ինքը հանձնարարել է դատական հայց նախապատրաստել ֆրանսիական շաբաթաթերթի և ծաղրանկարի հեղինակի դեմ: