Թուրքիան Charlie Hebdo-ի աշխատակիցների համար պահանջել է մինչեւ չորս տարվա ազատազրկում

Անկարայի դատախազությունը պահանջել է, որ ֆրանսիական Charlie Hebdo երգիծական ամսագրի չորս աշխատակից դատապարտվի ազատազրկման՝ 1-ից 4 տարի ժամկետով՝ Թուրքիայի նախագահ Ռեջեփ Թայիփ Էրդողանին վիրավորելու գործով. հաղորդում է թուրքական DHA-ն:

Էրդողանը դատի է տվել Charlie Hebdo-ին 2020 թվականի հոկտեմբերին՝ վիրավորական ծաղրանկարի համար, որը ամսագիրը տպագրել էր իր շապիկին՝ Փարիզի և Անկարայի հարաբերությունների ճգնաժամի ֆոնին: Թուրքիայի ղեկավարին նկարում ցույց են տալիս կիսամերկ տեսքով, բազկաթոռին նստած և աջ ձեռքում զովացուցիչ ըմպելիքի տարա պահած: Նա մյուս ձեռքով բարձրացնում է ծառա կնոջ զգեստի ծայրը: Ծաղրանկարի տակ գրված է. «Էրդողանը շատ չարաճճի է իր անձնական կյանքում», իսկ Էրդողանը բացականչում է. «Օ լա լա, մարգարե»:

Անկարայի դատախազության կողմից պատրաստված մեղադրական եզրակացության համաձայն՝ Charlie Hebdo-ի չորս աշխատակիցներ, այդ թվում՝ ամսագրի գլխավոր խմբագիր Ջերար Բյարը, մեղավոր են ճանաչվել Էրդողանին վիրավորելու մեջ: Հետաքննության համաձայն` նրանք պատասխանատու են Թուրքիայի առաջնորդին պատկերող ծաղրանկարի հրապարակման համար, ինչը «կոպիտ, անպարկեշտ, վիրավորական ու նվաստացուցիչ է»:

Հարցումներն ուղարկվել են Ֆրանսիայի իրավապահ մարմիններին՝ մեղադրյալներից ցուցմունքներ ստանալու համար: