ՊԵԿ-ը պարզաբանում է՝ ինչու են փակվել «ՍԱՍ» սուպերմարկետներից երկուսը

Երևան քաղաքի Թումանյան փողոցի և Բաղրամյան պողոտայի «ՍԱՍ» սուպերմարկետներն այսօր առավոտից փակ են: Armtimes.am-ի տեսախցիկը ֆիքսել էր, թե ինչպես Թումանյան փողոցի սուպերմարկետից օգտվող քաղաքացիներին հենց մուտքի մոտ տեղեկացնում են, որ սուպերմարկետը փակ է, իսկ բացվելու մասին որևէ պարզաբանում չի տրվում: Նշենք, որ սուպերմարկետը փակվել է ԿԱ ՊԵԿ-ի կողմից՝ հարկային ստուգում իրականացնելու նպատակով:

Yerkir.am-ին ՊԵԿ-ի լրատվական բաժնից հայտնեցին, որ ՀՀ ԿԱ պետական եկամուտների կոմիտեն օրենսդրությամբ վերապահված լիազորությունների շրջանակում է իր գործառույթն իրականացնում:

Հարցին՝ ինչո՞վ է պայմանավորված հենց հիմա այդ ստուգումներն իրականացնելը, ՊԵԿ-ից պատասխանեցին, որ այս պահի դրությամբ ավելին ասել չեն կարող:

Փորձեցինք կապ հաստատել նաև «ՍԱՍ» սուպերմարկետների ցանցից որևէ պատասխանատուի հետ, սակայն հեռախոսազանգերն անպատասխան մնացին:

Նշենք նաև, որ «ՍԱՍ» սուպերմարկետների ցանցը պատկանում է ԱԺ ՀՀԿ-ական պատգամավոր Արտակ Սարգսյանին: