Ամեն ինչ արեցի Էրդողանի հրամանով. Դինքի սպանության մեջ կասկածվողի աղմկահարույց հայտարարությունը

Թուրքիայում լույս տեսնող հայկական «Ակօս» թերթի գլխավոր խմբագիր Հրանտ Դինքի սպանության մեջ կասկածվողներից Ստամբուլի ոստիկանության հետախուզական բաժնի նախկին պետ Ալի Ֆուաթ Յըլմազերն աղմկահարույց հայտարարություն է արել՝ նշելով, որ իր պաշտոնավարման շրջանում նա ոչ մի քայլ չի կատարել առանց այն ժամանակվա վարչապետ Ռեջեփ Թայիփ Էրդողանի հետ համաձայնեցնելու:

Ըստ «Ակօս»-ի՝  Յըլմազերը այդ գործով դատական 10-րդ նիստի ընթացքում հայտարարել է, որ ամեն ինչ արել է Էրդողանի հրամանով: «Էրգենեկոնի» վերաբերյալ բոլոր հրամաններն անձամբ Էրդողանից եմ ստացել»,- նշել է կասկածվողը: 

Ստամբուլի ոստիկանության հետախուզական բաժնի պետ` անձամբ Էրդողանի կողմից նշանակված Յըլմազերը հայտարարել է, որ Հրանտ Դինքին պետք էր պաշտպանել այնպես, ինչպես հիմա Օրհան Փամուքին:

«Բոլորն էլ գիտեն` վախի մթնոլորտը սկսվել է Ստամբուլում: Այս ամենը մեզ հետ կապ չունի, Ստամբուլի ոստիկանության գործն էր: Նայեք Օրհան Փամուքի (Նոբելյան մրցանակակիր գրող) գործին, հետաքննության զեկույցները կապված են Ստամբուլի ոստիկանության հետ: Ինձ հետ ի՞նչ կապ ունի: Ինչպես որ Օրհան Փամուքն է պաշտպանության տակ վերցվել, այնպես էլ Դինքը պետք է պաշտպանվեր», - ասել է նա:

Նշենք, որ այժմ Յըլմազերը կասկածվում է Թուրքիայում հուլիսի 15-ի ռազմական հեղաշրջման փորձի մեջ մեղադրվող Գյուլենական շարժման անդամ լինելու մեջ և ձերբակալվել է հեղաշրջման փորձից հետո սկիզբ առած հետաքննության շրջանակներում: