Ո՛չ գնացքն է գնացել, ո՛չ՝ ինքաթիռը. Ծառուկյանի հայտարարությունը չի ուշանա

Ծառուկյանի՝ քաղաքականություն վերադառնալու մասին հայտարարությունը շատ չի ուշանա. Yerkir.am-ի հետ զրույցում ասաց ԲՀԿ-ական պատգամավոր Միքայել Մելքումյանը: «Ծառուկյանի վերադարձը լուրջ փոփոխություններ է մտցնելու քաղաքական դաշտում, դա բնական է, բայց նրա վերադարձը կլինի ճիշտ ժամանակին,  ինչո՞ւ եք շտապում:  Ինչի՞ց  է ուշանում, ինձ թվում է՝ ո՛չ գնացքն  է գնացել, ո՛չ՝ ինքաթիռը, ամեն ինչ նորմալ է, թող  ամեն ինչ ճիշտ ժամանակին լինի»,- ասաց նա:

Մելքումյանից հետաքրքրվեցինք՝ հնարավո՞ր է Ծառուկյանը «փոշմանի» և չվերադառնա քաղաքականություն: Նա պատասխանեց. «Էդ հարցին պարոն Ծառուկյանը կպատասխանի, բայց ես կարծում եմ, որ` ոչ, այլապես  նրա ասածները… Նա ի՞նչ է ասել, ուշադիր պետք է հետևել նրա ասածներին, նա ասել է, որ  մոտ ժամանակներում ապագա իր գործողությունների վերաբերյալ հայտարարությամբ հանդես կգա: Եկեք  սպասենք և կանխատեսումներ չանենք: Իսկ իմ անձնական կարծիքով՝ պարոն Ծառուկյանը պետք է վերադառնա, և դա կենսական անհրաժեշտություն է: Նա որ գա, չեմ կասկածում, որ բարձր ձայներ են լինելու: Իսկ ինչո՞ւ չլինի այլընտրանքային լուրջ բևեռ, դա բխում է մեր պետության շահերից»:

Խոսելով ռեյտինգային ընտրակարգով առաջադրվելու մասին՝ Մելքումյանն ընդգծեց, որ վերջնական քաղաքական որոշում այդ մասին չկա, և Ծառուկյանի վերադարձն այդ հարցում էլ կարող է որոշակիություն մտցնել:

«Այդ հարցն էլ է որոշելու կուսակցությունը, և եթե պարոն Ծառուկյանը վերադառնա, այդպես կլինի: Եվ երկրորդ` ես Կենտրոնի բնակիչ եմ և Կենտրոն համայնքը շատ լավ գիտեմ, տիրապետում եմ ամեն ինչին: Վարկանիշայինից չպետք է վախենալ, հակառակը` պետք է գնալ և հասկանալ՝ ժողովուրդը ոնց է ընդունում քեզ: Բա որտե՞ղ դնեմ, հո չե՞մ գնալու` Շիրակում դնեմ: Բայց էլի եմ ասում՝ վերջնական որոշում չկա, թող հայտարարությունը լինի, դրանից բխող լուծումները լինեն, որոշումներ էլ կլինեն»,- նշեց ԲՀԿ-ական պատգամավորը:

Նրա խոսքով՝ Գագիկ Ծառուկյանի հետ հանդիպումները պարբերական բնույթ են կրում, և վերջերս էլ՝ դեկտեմբերի 25-ին, խմբակցության կազմով են հանդիպել Ծառուկյանի հետ՝ նախատոնական միջոցառման շրջանակներում:

«Աշխատանքային հանդիպումներն էլ են պարբերական»,- ասաց Մելքումյանը՝ հավելելով, որ Ծառուկյանի հայտարարությունը չի ուշանա: