Վարդան Պետրոսյանի մասնակցությամբ աղմկահարույց տեսարանը բեմադրված է, այն առաջնագծում չի նկարվել

«Մարտիկ» հաղորդաշարի ռեժիսոր Արման Վարդանյանը հայտնել է, որ Վարդան Պետրոսյանի մասնակցությամբ աղմկահարույց տեսարանն առաջնագծում չի նկարվել, հատկապես` «ղարաբաղա-ադրբեջանական»:

««Մարտիկ» հաղորդաշարի տոնական -հատուկ թողարկումից հետո՝ սկսվեց բուռն քննարկում, որ դերասան Վարդան Պետրոսյանը «ադրբեջաներեն «ակցենտով» անհասկանալի իդիոմետրիկ արտահայտություններով հայհոյել է հակառակորդին», որով իբր վտանգել է «դիտակետում կանգնած» զինվորներին: Պաշտոնապես հայտարարում եմ` «Մարտիկ» հաղորդաշարը արդեն 23 տարի է եթերում է, հաղորդման ղեկավարն է ՀՀ վաստակավոր և ռազմական լրագրող, ԶՈՒ պահեստազորի գնդապետ՝ Ս. Շահսուվարյանը: Ստեղծագործական կազմում են՝ երկրում եզակի, ռազմական լրագրության և օպերատորության վարպետներ: Ոչ զորամասի հրամանատարությունը, ոչ էլ «Մարտիկի» ստեղծագործական խումբը, չէր իրականացնի այնպիսի գործողություններ, որը կարող էր վնասել զինվորների անվտանգությանը: Հաղորդման միայն այդ տեսարանն է բեմադրված, կրկնում եմ ո՛չ դիրքերում, մնացածը դոկումենտալ է»,- իր ֆեյսբուքյան էջում գրել է Վարդանյանը:

Նա նաև շնորհակալության է հայտնել Ռուբեն Հախվերդյանին, Եղիշե Պետրոսյանին, Գևորգ Մովսիսյանին, Ռուբեն Եղոյանին և Արեգ Նազարյանին` «բանակ զորակոչվելուն միշտ պատրաստ լինելու համար»: «Պատահական չէր հյուրերի ընտրությունը, քանի որ բանակը բոլորինն է և վտանգի ժամանակ բոլորս համախմբվում ենք նրա շուրջ՝ անկախ հայացքներց, դավանանքից, հասարական և սոցիալական դիրքից և այս հաղորդումը դրա վառ ապացույցն է: Իսկ հաղորդման նկարահանումների մասին ուզում ենք նշել, որ այն ամբողջությամբ նկարվել է Non-Stop, առանց մեկից ավելի դուբլի: Հատկապես Վարդան Պետրոսյանի տեսարանը, որի երկրորդ դուբլ նկարելը՝ մեզ և Վարդանի համար, պարզապես վիրավորական կլիներ: Շնորհակալություն բոլորին, անգամ նրանց ովքեր վատաբանեցին, ձեր քննադատությունը ինձ համար անակնկալ չէր ,քանի որ ես կանխատեսել էի, թե ինչ որակի հաղորդմում կստանանք և ինչ գնահատականներ կհնչեն: Շնորհակալություն բոլորին ևս մեկ անգամ»,- գրել է Վարդանյանը: