Կադաֆիի դիակի հետ նկարվել ցանկացողների հերթ է գոյացել

Միսուրատայի հազարավոր բնակիչներ հերթ են կանգնել քաղաքի շրջաններից մեկի շուկայի մոտ, որպեսզի իրենց իսկ աչքով տեսնեն Լիբիայի նախկին առաջնորդ Մուամար Կադաֆիի դիակը, որը պահվում է սննդի համար նախատեսված սառնարաններից մեկում. հաղորդում է ИТАР-ТАСС-ը:

Դիակը պահելու համար ընտրվել էր մարդկանց աչքերից հեռու այդ տեղը,  սակայն գաղտնիքը պահպանել չի հաջողվել: Եվ երբ մարդիկ են սկսել հավաքվել, իշխանությունները որոշել են մարմինը բոլորին տեսանելի մի վայրում դնել:

Շուկա այցելողները, այդ թվում` նաեւ երեխաները, նկարվում են սպանված Կադաֆիի հետ: Քանի որ Կադաֆիի հետ նկարվել ցանկացողների հսկայական հերթ է գոյացել, մարմինը հսկող անվտանգության ծառայողները այցելության ժամեր են սահմանել նրա ընտանիքի եւ բարեկամների համար:

Նախատեսվում է, որ Կադաֆիի մարմինը հողին կհանձնվի վաղը, սակայն հավանական է, որ հետաձգվի, քանի որ նոր իշխանությունները գերեզմանի համար հարմար տեղ դեռեւս չեն գտել:

Նրա գերեզմանի վայրը գաղտնի է պահվելու, որպեսզի Կադաֆիի համախոհների համար այն ուխտագնացությունների վայր չդառնա: