Թուրքիայում սրընթաց ու անկանխատեսելի փոփոխություններ են տեղի ունենում. Ռուբեն Սաֆրաստյան

Այսօր լրագրողների հետ զրույցում ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանն անդրադարձել է Թուրքիային վերաբերող աշխարհաքաղաքական հարցերին: Նրա խոսքով` Թուրքիա պետությունը ներկա պահին փոփոխվում է, և այդ փոփոխությունները սրընթաց են տեղի ունենում:

«Փոփոխությունների կենտրոնում է Թուրքիայի նախագահ Էրդողանը, ով անկանխատեսելի գործիչ է: Դժվար է կանխատեսել իրադրության զարգացումները Թուրքիայում, որտեղ անցյալ տարի սկսվեցին ահաբեկչական գործողություններ: «Իսլամական պետությունը» կշարունակի իր ահաբեկչական  գործողությունները Թուրքիայում»,- ասաց Ռուբեն Սաֆրաստյանը:

Թուրքագետի մոտ հարց է առաջանում` արդյո՞ք Թուրքիայի անվտանգության  ծառայությունները  չեն համագործակցում ԻՊ-ի հետ: Նա ենթադրում է, որ նման բան կա, և որ Թուրքիայի անվտանգության ծառայությունը թույլ է տալիս, որ ահաբեկչական գործողություններ տեղի ունենան, և իրադրությունը Թուրքիայում  ավելի կսրվի:

Սաֆրաստյանի խոսքով` տարածաշրջանում նկատվում է նոր երևույթ` Թուրքիան ձգտում է համագործակցել Ռուսաստանի հետ Սիրիայի հարցում:  էրդողանը որոշեց իր դաշնակից ԻՊ-ից   հրաժարվել ու համագործակցել Ռուսաստանի հետ` նպատակ ունենալով  Սիրիայում  ձեռք բերել ազդեցության գոտիներ, միաժամանակ լուծել քրդական հարցը, որ հանկարծ քրդերի ձեռքում չհայտնվի թուրք-սիրիական սահմանի մի մասը: