Փորձելու են խրախուսել արտահանումը նաև դեպի ԵՄ երկրներ

Այսօր` լրագրողների հետ հանդիպման ժամանակ, ՀՀ տնտեսական զարգացման և ներդրումների նախարար Սուրեն Կարայանն ամփոփեց 2016 տնտեսական տարին:

Խոսելով Իրանի հետ տնտեսական հարաբերությունների մասին` նա նշեց, որ բանակցություններ են տարվում Իրանի համապատասխան կառույցների հետ Հայաստանում կատարված սերտիֆիկացումը ճանաչելի դարձնելու, Հայաստանում պարենային և ոչ պարենային արտադրանքի համապատասխանության գնահատման մարմինների ներկայացուցչություններ բացելու ուղղությամբ: Աշխատանքներ են տարվում նաև Իրանի սահմանագծին ազատ տնտեսական գոտու  ձևավորման ուղղությամբ: Նախատեսվում է, որ մինչև ապրիլ ազատ տնտեսական գոտու ստեղծման աշխատանքները սկսված կլինեն:

Նախարարը կարևորեց գործարարությամբ զբաղվելու կանոնների  պարզեցումն ու  հստակեցումը: Սահմանվել են արտոնյալ հարկային ռեժիմներ:

Ըստ Կարայանի` Հայաստանի անդամակցությունը ԵՏՄ-ին տվել է դրական արդյունքներ, արձանագրվել է արտահանման ծավալների աճ:

Հարցին, թե ինչո՞ւ հաշվետվության մեջ բացակայում են ԵՄ երկրներ, ԱՄՆ և Չինաստան արտահանման հաշվետվություններն ու տեսլականը, նախարարը պատասխանեց, որ մի քանի փուլերով են փորձելու խրախուսել արտահանումը, դրանից մեկը արտոնյալ ռեժիմով շուկաներում խոչընդոտների վերացումն է:

«Մենք ակտիվ աշխատանքներ ենք իրականացնում, որ արտահանման ծավալները ավելացնենք դեպի ԵՄ շուկաներ, համապատասխանեցնենք որակի ենթակառուցվածքները: Կստեղծվի լոգիստիկ կազմակերպություն, որը հնարավորություն կտա ԵՄ երկրներ արտահանել»,- ասաց նախարարը: