Հաստատվեց ռազմավարական ծրագրերի կենտրոնի ու հիմնադրամի ստեղծման նախագիծը

Կառավարության նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց որոշում, որը վերաբերում էր ռազմավարական ծրագրերի համար ստեղծվող  հիմնադրամին: Նրա խոսքով` հիմնադրամի առջև դրվում են մի շարք կարևոր խնդիրներ, մասնավորապես` աջակցություն կառավարությանը ՀՀ կառավարության երկարաժամկետ տեսլականի մշակման հարցում, կարճաժամկետ ծրագրերի և ռազմավարական ծրագրերի հետ կապված այլ հարցերում:

Ստեղծվելու է հիմնադրամի հոգաբարձուների խորհուրդ, որի 3 անդամները նշանակվելու են ի պաշտոնե: Նրանք են` ՀՀ վարչապետը, ֆինանսների նախարարը, տնտեսական զարգացման և ներդրումների նախարարը, ևս երկու հոգի կնշանակվեն գործադիրի կողմից, և 6 անդամ ներկայացնելու է մասնավոր հատվածը:

Վարչապետ Կարեն Կարապետյանը հավելեց, որ ռազմավարական ծրագրերի այս կենտրոնը կառավարությունը շատ է կարևորում, դա այն հարթակն է, որտեղ ձևավորվելու է կառավարության տեսլականը, թե ինչպես են պատկերացնում տնտեսության զարգացումը` ըստ ոլորտների ու մակրոցուցանիշների:

Որոշումն ընդունվեց: