Ավիատոմսերն էլի էժանանալու տեղ ունեն. քաղավիացիայի վարչության պետ

Քաղավիացիայի վարչության ղեկավար Սերգեյ Ավետիսյանն այսօր լրագրողների հետ զրույցում իր ամփոփիչ ասուլիսում Հայաստանի քաղավիացիայի շուկան համեմատել է Վրաստանինի հետ:

Նրա խոսքով` կան ուղղություններ, որոնք Թբիլիսում ավելի էժան են, կան ուղղություններ, որոնք թանկ են: Մասնավորապես` Երևանից Փարիզ չվերթն ավելի էժան է, քան Թբիլիսիից` Փարիզ, ռուսական ուղղությունները Երևանից նույնպես ավելի էժան են:

«Վրացական ավիացիոն շուկան տարբերվում է հայկականից նրանով, որ դրանում բավական ակտիվ դերակատարում ունեն թուրքական ավիաընկերությունները, որոնք ազդում են գնի իջեցման վրա»,- ասաց Սերգեյ Ավետիսյանը:

Նրա խոսքով` Հայաստանի շուկան ուժեղ մրցակցություն ունի, ինչն էլ կարող է նպաստել տոմսերի գների նվազմանը:

Սերգեյ Ավետիսյանը չհամաձայնեց այն տեսակետի հետ, թե «Զվարթնոց» օդանավակայանի գները շատ թանկ են, քան աշխարհի այլ օդանավակայանի գները:

Ինչ վերաբերում է տոմսերի գներին, նա նշեց, որ ավիատոմսերը էժանացել են և էլի տեղ ունեն էժանանալու: Միաժամանակ, Ավետիսյանը հարկ համարեց նշել, որ քաղավիացիան տոմսերի գներով չի զբաղվում, և որ տոմսերի գները ձևավորում է  շուկան: «Եթե մի ավիափոխադրողի հաջողվի 3 միլիոն դրամով տոմս վաճառել, ուրեմն կմտնեն շուկա ու կսկսեն վաճառել»,- ասաց նա: