Չցանկանալով ՀԱԿ-ին «ռասկրուտկա» անել` Աշոտյանը, այնուամենայնիվ, Տեր-Պետրոսյանի ելույթում երկու խնդիր տեսավ

ՀՀԿ կենտրոնական գրասենյակում լրագրողների հետ հանդիպման ժամանակ ՀՀԿ փոխնախագահ Արմեն Աշոտյանն անդրադարձավ ՀԱԿ առաջնորդ Լևոն Տեր-Պետրոսյանի վերջին հայտարարություններին:

Աշոտյանը նախ նշեց, որ ՀԱԿ-ը, որպես քաղաքական միավոր, էներգիա է կորցրել, և հիմա ՀԱԿ-ի համար որպես էներգիայի աղբյուր է մնացել  երկրի առաջին նախագահը` որպես քաղաքական մտավորական: Եվ քաղաքական տեխնոլոգիայի առումով, ըստ նրա, ՀԱԿ-ի նկատմամբ ուշադրություն և օրակարգ ձևավորելու տեսանկյունից Լևոն Տեր-Պետրոսյանը ճիշտ էր:

«Մենք չենք ցանկանում մասնակցել այդ  օրակարգի քննարկմանը, այսպես ասած` «ռասկրուտկային», որովհետև մենք սեփական քաղաքական օրակարգ ունենք»,- ասաց Աշոտյանը:

Միևնույն ժամանակ, նա ներկայացրեց իր  անձնական կարծիքը Լևոն Տեր-Պետրոսյանի ելույթի մասին` դրանում տեսնելով երկու խնդիր-հարցադրում:

«Արդյո՞ք պատեհ պահն էր ապրիլյան պատերազմից հետո, երբ բանակցություններ էին ընթանում բանակցությունների մասին, այսպես ասած` հարսանիքից  առաջ որոշել թոռան անունը: Եվ երկրորդ` արդյո՞ք ճիշտ էր քաղաքական տեսանկյունից, որ ռադիկալ քաղաքական ընդդիմությունը փորձի լինել ավելի ճկուն ու բարիշող,  քան իշխանությունը: Ե'վ առաջին, և' երկրորդ հարցադրման պատասխանն է` ոչ»,- ասաց Աշոտյանը: