Լավ է՝ Լեւոն Տեր-Պետրոսյանի անվան մասնավոր բուհ չեք բացել. Աշոտյանը՝ Արամ Մանուկյանին

Այսօր ԱԺ նիստում կառավարության հետ հարցուպատասխանի ժամանակ ԱԺ ՀԱԿ խմբակցության պատգամավոր Արամ Մանուկյանը, ժողովրդական լեզվով ասած, բուհերում «նեդաբորի» մասին հարց ուղղեց ՀՀ կրթության ու գիտության նախարար Արմեն Աշոտյանին:

«Ո՞վ է այս անմխիթար քաղաքականության պատասխանատուն»,- հարցրեց պատգամավորը, նաեւ դժգոհեց մասնավոր բուհերի նկատմամբ նախարարության իրականացրած քաղաքականությունից:

Ի պատասխան, Արմեն Աշոտյանը հայտարարեց, որ Արամ Մանուկյանի հարցի մեջ ակնհայտ մասնավոր շահ է երեւում եւ մեջբերեց 90-ականներին կրթության ոլորտում տարվող քաղաքականության մասին:

«90-ականներին բացվեցին տասնյակ մասնավոր բուհեր, որոնց որակը երբեք չի ստուգվել, մարդկանց տվել են գունավոր պրինտերով տպված դիպլոմներ: «Մսրա Մելիք» համալսարան, չգիտեմ ինչ համալսարան, լավ ա՝ Լեւոն Տեր-Պետրոսյանի անվան մասնավոր բուհ չեք բացել, էդպես էլ կարող էիք անել: Եվ այդ ամենի արդյունքում` վատ ճակատագրեր, խաբված մարդիկ, որոնց վրա մարդիկ փող են աշխատել անորակ մասնավոր բուհերով»,- ասաց ԿԳ նախարարը: