ԱՄՆ Կենտրոնական հետախուզական վարչությունը ներողություն է խնդրել Թուրքիայից

ԱՄՆ Կենտրոնական հետախուզական վարչությունը (ԿՀՎ - CIA) և պետքարտուղար Ջոն Քերին ներողություն են խնդրել Թուրքիայից «Իսլամական պետություն» (ԻՊ) ահաբեկչական կազմակերպության հետ նավթի առևտուր իրականացնելու մեջ անհիմն մեղադրելու համար. տեղեկացնում է Ermenihaber-ը:

Թուրքական Sabah-ը նշում է, որ Քերին դեռևս 2014-ին ՄԱԿ-ում Թուրքիայի արտգործնախարար Մևլութ Չավուշօղլուին ասել էր, որ ամերիկյան կողմն ունի տեղեկություններ և լուսանկարներ, ըստ որոնց՝ Թուրքիան ԻՊ-ից  նավթ է գնում: Ապա Քերին  նշյալ տեղեկությունները և լուսանկարները  փաթեթի տեսքով հանձնել էր թուրքական կողմին:  Վերջինս էլ դրանք փոխանցել էր երկրի հետախուզության ծառայությանը:

Ըստ թուրքական աղբյուրի՝ իրականացված ուսումնասիրությունների արդյունքում պարզվել է, որ նշյալ տեղեկությունները չեն համապատասխանում իրականությանը: Իսկ լուսանկարներում  պատկերված են եղել Թուրքիայի Քիլիս քաղաքի շինարարական բեռների փոխադրման համար նախատեսված բեռնատարները: