Լարսը կբացվի ձյունը դադարելու պարագայում. փոխնախարար

ՀՀ տրանսպորտի, կապի և ՏՏ փոխնախարար Արթուր Առաքելյանն այսօր խորհրդարանում լրագրողների հետ զրույցում, անդրադառնալով Լարսում արգելափակված բենռատարների հարցին, նշեց, որ նախարարի հետ այցի ժամանակ ականատես են եղել, որ վրացական ծառայությունները ճշգրտությամբ կատարում են իրենց աշխատանքը:

«Վրացի պաշտոնյաները ևս հավաստիացրեցին, որ եթե անհրաժեշտ լինի, կկրկնապատկեն, կեռապատկեն և' տեխնիկայի, և' աշխատող մարդկանց թիվը: Ով եղել է Լարսում, կարող է հասկանալ` ինչ է կատարվում այնտեղ. ձյունը չի դադարում, ձնակույտերի հոսքերի վտանգ կա: Սինոպտիկների կողմից հատուկ դատչիկներ են դրված, որոնք ազդարարում են վտանգների մասին և, այդ վտանգի` համապատասխան շեմը անցնելու դեպքում նրանք փակում են ճանապարհը: Դա կախված է բացառապես երթևեկության անվտանգության հետ»,- ասաց փոխնախարարը:

Հարցին` բազմաթիվ բեռնատարներ են այնտեղ մնացել, և բանանի 10 տոննա նոր քանակը, որ բերվում է, ապրանքը փչանալու դեպքում պետությունը ինչ-որ բան կանի՞, նա արձագանքեց. «Չեմ կարող այս պահին հստակ ասել` արդյո՞ք կլինի աջակցություն: Ամեն դեպքն անհատապես պիտի լինի, պետք է համապատասխան դիմում լինի, բայց չեմ կարող ասել: Այդպիսի մեխանիզմներ նախատեսված չեն: Բեռնափոխադրումների շրջանակներում աշխատում են տարբեր ռիսկերի գնահատման և դրանց ամրագրման մեխանիզմներ»:

Փոխնախարարը նշեց, որ բեռի ապահովագրված լինելու դեպքում փոխհատուցում կլինի, այլ դեպքերի համար դժվարացավ ասել` կլինի՞ փոխհատուցում, թե՞ ոչ:

Ըստ Առաքելյանի` սա, անշուշտ, ֆորսմաժորային իրավիճակ է, և ճանապարհը փակ է բացառապես եղանակային պայմանների պատճառով, մարդկային գործոնն իսպառ բացակայում է:

Խոսելով այն մասին, թե հիմա ի՞նչ պայմաններում են գտնվում վարորդները, փոխնախարարը նշեց, որ նախարարն այցելել է ինչպես վրացական, այնպես էլ ռուսական տարածք և խոսել բոլորի հետ, ում հնարավոր է եղել մոտենալ:
Առաքելյանի խոսքով` վարորդները զրուցել են նախարարի հետ և պայմանավորվածություն ձեռք բերել, տարբեր խնդիրներ են բարձրացրել: «Քանի որ մենք կապի մեջ ենք խոշոր բեռնափոխադրող ընկերությունների ղեկավարների հետ, նախարարն առաջարկեց Հայաստան հասնելուն պես, եթե անհատ վարորդներ կան, ովքեր ցանկություն ունեն լսելի դարձնել իրենց ձայնը և նախարարին հասցնել տարբեր տիպի մտահոգություններ,  հավաքվեն նախարարությունում: Խոշորների հետ աշխատում ենք, սակայն անհատների ձայնն էլ անպայման լսելի պետք է  լինի»,- ընդգծեց փոխնախարարը:

Իսկ թե ե՞րբ բեռնատարներին թույլ կտան անցնել ճանապարհով, նա ասաց, որ անշնորհակալ գործ է հստակ խոսել եղանակի տեսության մասին: Առաքելյանը կարծիք հայտնեց, որ հնարավոր է` շաբաթ, կիրակի օրերի ընթացքում ձնամաքրման աշխատանքները հաջողության հասնեն, եթե, իհարկե, ձյունը կտրվի: