ՀՅԴ-ն, անկախ ընտրության արդյունքներից, չի դադարելու հայ ժողովրդի կուսակցությունը լինել. Արծվիկ Մինասյան

Մենք, առնվազն իմ գնահատմամբ, հավակնում ենք բավական լավ ձայների, քանի որ խորհրդարանը առանց «Դաշնակցության» պատկերացնելը, կարծում եմ, որ անհնար է: Այս մասին Tert.am-ի հետ զրույցում ասաց ՀՅԴ-ական Արծվիկ Մինասյանը` անդրադառնալով արտահերթ խորհրդարանական ընտրություններին ՀՅԴ-ի շանսերին:

«Պատմության ընթացքում էլ սխալ կլինի, քանի որ 128-ամյա քաղաքական ուժը, երբ շատ երկրներում ազդեցիկ դերակատարություն ունի, ներկայացված չլինի խորհրդարանում: Դա, կարծեք թե, ժողովուրդը ինքն իր ողնաշարը կոտրելու գործողություն կլինի»,-ասաց նա:

Ըստ նրա` ՀՅԴ-ն ներկա պայմաններում շատ ավելի մեծ վստահություն կունենա, քանի որ արտաքին և ներքին մարտահրավերները շատ են: «Այս ամենով հանդերձ, շատ կարևոր է Դաշնակցության պատկառելի ներկայությունը, որ կարողանանք պետության դիմադրողականությունը բարձրացնենք, մյուս կողմից՝ իշխանությանը հնարավորություն տանք, որ այդ դիմադրողականությունը օգտագործեն մարտահրավերների չեզոքացման համար»,-ասաց նա:

Հարցին, թե ՀՅԴ-ն ընդդիմության դաշտո՞ւմ է գործելու, Արծվիկ Մինասյանն ասաց.«Դաշնակցությունը միշտ հանդես է գալիս պետականության ողնաշարի դիրքերից, և նրանք, ովքեր կարողացել են գնահատել Դաշնակցությանը, համագործակցությունը ավելի սերտ է եղել, պետական ուղեգծից դուրս չի եկել»,-ասաց նա և նկատեց, որ փորձել են շփոթել պետականության ողնաշարին մոտ լինելը «կողմ լինելով դեմ լինելու հետ»:

«Մենք մի կարևոր եզրահանգման ենք եկել, Դաշնակցությունը, հետայսու, բացառելու է որևէ քաղաքական կոալիցիա, եթե իր ձայնը, դերակատարությունը վճռական չէ, այսինքն, եթե անհրաժեշտ մեծամասնությունը, ձայները կան, իմաստ չկա, որ մենք նորից, ավելորդ անգամ մտնենք այդ հարաբերության մեջ»,-ասաց նա:

Դիտարկմանը՝ այսինքն սխա՞լ էր ՀՀԿ-ի հետ կոալիցիա կազմելը, նախկին նախարարն ասաց. «Սխալ բառը մի քիչ կոպիտ է ասած, գուցե թերացում ասենք: Թերևս, առանձին դեպքերում ճիշտ չէ, որ մենք այն ժամանակ մտնաք կոալիցիաների մեջ, երբ դրա անհրաժեշտությունը չկար»,-ասաց նա:

Չնայած դրան` նա նշեց, որ նույնիսկ այդպիսի դեպքում, երբ ձայների տեսակետից իրենց ազդեցությունը թեև վճռական չէր, բայց իրենց ազդեցությունը եղել է շատ ավելի շատ, քան այդ ձայներ են եղել:

Արծվիկ Մինասյանը նշեց նաև, որ Դաշնակցությունը ստիպված է եղել աշխատել այն իշխանության հետ, որը ձևավորել է ժողովուրդը: «Հիմա մեղադրում են իշխանության հետ համագործակցելու համար, բայց չէ՞ որ ընտրողներն են ձևավորել այդ իշխանությունը, հիմա ի՞նչ աներ Դաշնակցությունը, ճամպրուկները վերցներ մի կողմ կանգնե՞ր,-ասաց նա և նշեց, որ ՀՅԴ-ն, անկախ ընտրության արդյունքներից, չի դադարելու հայ ժողովրդի կուսակցությունը լինելուց:

Նա ասաց, որ ներկայիս կառավարությանը ընդդիմություն չեն, քանի որ այսօրվա դրությամբ կառավարությունը գործում է այն ծրագրով, որոնք իրենք էլ են հաստատել, բայց որոշակի շեղումները եղել են, ինչի արդյունքում որոշակի քննադատությամբ են հանդես եկել:

Անդրադառնալով արդարադատությանը՝ Արծվիկ Մինասյանն ասաց, որ վտանգավոր է իրավական գնահատականները քաղաքական փաթեթավորմամբ և հակառակը ներկայացնելը: Մասնավորապես, ՀՀ 2-րդ նախագահ Ռոբերտ Քոչարյանին առաջադրված մեղադրանքի առումով, նա ասաց, որ Սահմանադրական կարգի տապալում արտահայտությունը պետականությանը կպած գործողություն է, և պետք է շատ զգույշ լինել, որ քաղաքական հետապնդման տպավորություն չստեղծվի:

Անդրադառնալով արտաքին քաղաքականությանը՝ Արծվիկ Մինասյանն ասաց, որ արտաքին ճնշումները չափազանց շատ են: «Անդրբեջանը անթաքույց վարում է մի քաղաքականություն, որ հողը դեպի իրեն քաշելով՝ առաջ է գալիս, թեև չեզոք գոտու տարածքներ են, բայց սա սպառնալիք է, ֆիզիկական սպառնալիք է երկրին»,-ասաց նա:

Լիանա Առաքելյան