Այսօր մենք չունենք վատ վիճակում գտնվող թանգարան. Սերժ Սարգսյան

Չեմ կիսում կարծիքը, որ մենք թանգարանային գործունեությանն ուշադրություն չենք դարձնում և ոլորտում ողբալի վիճակ է: Արցախում մշակութային գործիչների հետ հանդիպման ժամանակ ասաց ՀՀ նախագահ Սերժ Սարգսյանը:

Ըստ նրա` այսօր մենք չունենք վատ վիճակում գտնվող թանգարան: «Վերջին մի քանի տարիների ընթացքում Մատենադարանը ամբողջացրինք, Կոմիտասի թանգարանը կառուցեցինք, Մարտիրոս Սարյանի թանգարանն ամբողջովին վերանորոգեցինք»,- ասաց նախագահը:

Թանգարանային ոլորտի մասնագետները բարձրաձայնեցին Ժամանակակից արվեստի թանգարան ունենալու անհրաժեշտության մասին, ինչին ի պատասխան` Սարգսյանը նշեց, որ ինքն էլ է համամիտ` ժամանակակից արվեստի թանգարանն անհրաժեշտություն է. «Պետք է ուղղակի ոլորտի առաջնահերթությունները դասակարգել, բայց, այո, համամիտ եմ` մեզ պետք է այդ թանգարանը: Ունենք նաև պատկերասրահ կառուցելու ծրագիր, որը ոչ թե փոքր մի բան կլինի, այլ 35-40 000 քմ ժամանակակից մի կառույց»:

Սերժ Սարգսյանը չկիսեց մտավորականներից մեկի հնչեցրած կարծիքը, որ օր-օրի կառուցվող եկեղեցիներից մեկի փոխարեն կարելի է 1-2 թանգարան կառուցել: Ըստ նախագահի` մեր բնակավայրերում շատ քիչ եկեղեցիներ ունենք: