Միշտ էլ այդպես է եղել. ՀՀԿ-ական պատգամավորի «խորիմաստ» պատասխանը՝ գների բարձրացման վերաբերյալ

ԱԺ ՀՀԿ խմբակցության պատգամավոր, սոցիալական հարցերի հանձնաժողովի նախագահ Հակոբ Հակոբյանն այսօր խորհրդարանում լրագրողների հետ զրույցի ժամանակ անդրադարձավ դեկտեմբեր ամսվա ընթացքում հայկական շուկայում մթերքների գների աճին: Ըստ պատգամավորի՝ մեզ մոտ դեկտեմբերին միշտ գները բարձրանում են և դա օրինաչափ է, քանի որ դեկտեմբերին սպառումը շատանում է, հետևաբար գներն էլ բարձրանում են:

«Այլ երկրներում սպառումը շատանում է, գինը նվազում է, բայց մեր երկրում դեկտեմբերին է միայն սպառումը շատանում, իսկ մնացած 11 ամիսներին սպառումը քիչ է: Այսինքն դեկտեմբերի սպառումը մյուս ամիսների համեմատ համաչափ չէ»,- նշեց նա: Հակոբյանի խոսքով, եթե ՀՀ-ում լիներ մի մարմին, որ կարող էր կարգավորել գները, ապա գները կիջնեին մեզ մոտ էլ, սակայն մենք նման մարմին չունենք և մեր շուկայական հարաբերությունների գործընթացքում գինը կարգավորվում է շուկայի թելադրանքով, ուստի ըստ նրա՝ դա էլ է բերում գների բարձրացման: Հակոբյանը նշեց, որ միշտ էլ այդպես է եղել. Նոր տարին լրացուցիչ ծախսեր է պահանջում:

«Թոշակներն ու աշխատավարձերը չեն բարձրանում, բայց ապրանքների գները բարձրանում են Նոր տարվա շեմին, դա միշտ այդպես է եղել, Նոր տարին լրացուցիչ ծախսեր է պահանջում, միայն մեզ մոտ չէ, դա բոլոր տեղերում էլ այդպես է»,- հայտարարեց պատգամավորը՝ հավելելով՝ արհեստական ոչինչ չկա գների բարձրացման մեջ. Դիտարկմանն էլ՝ վարչապետը հանձնարարություն էր տվել արհեստական գների բարձրացում չանել, Հակոբյանը կրկին նշեց, որ շուկան պետք է կարգավորի այդ ամենը: