Ուսումնասիրում են տրանսպորտի գների բարձրացման հարցերը. Գագիկ Բեգլարյան

Հայաստանի Հանրապետության տրանսպորտի եւ կապի նախարար Գագիկ Բեգլարյանը այսօր, պատասխանելով լրագրողների հարցերին, անդրադարձավ հասարակական տրանսպորտի գների բարձրացման հարցին:

«Այսօր, երբ Երևան քաղաքը գների բարձրացման մասին է խոսում, գիտեք, որ Երեւանում գոյություն ունի երթեւեկության երեք գին` ավտոբուս, միկրոավտոբուս, մետրո եւ տրոլեյբուս: Մեզ մոտ` տարբեր քաղաքներում, տարբեր գյուղերում միջպետական եւ պետական` մոտավորապես 40-ից ավել տարբեր գներ են. սկսվում է 200 դրամից եւ վերջանում 5000 դրամով: Ի տարբերություն մեզ, քաղաքում կարող են ասել` մենք 10 տոկոս ենք բարձրացնում այդ երեք տարբեր գների վրա, տեղ կա, որ մենք 10 տոկոս բարձրացնենք` 500 դրամ կլինի տարբերությունը, տեղ կա` 50 դրամ կամ 250 դրամ եւ այլն: Մենք պետք է կարողանանք այնպես անել, որ այդ համամասնությունը պահպանվի»,- ասաց Գագիկ Բեգլարյանը:

Նշելով, որ տրանսպորտի գները բարձրացնողն իր ղեկավարած նախարարությունը չէ` նա հավելեց, որ իրենք, սակայն, պետք է ուսումնասիրեն հարցը, որպեսզի առաջարկի դեպքում կարողանան ներկայացնել, թե կան նաեւ այսպիսի խնդիրներ: Այդ հարցին առնչվող խնդիրներն ուսումնասիրելու համար նախարարությունում ստեղծվել է հանձնաժողով, որը յուրաքանչյուր ուղու առանձնահատկություններն է ուսումնասիրում, քանի որ նախարարությունում ուզում են յուրահատուկ մոտեցում ցուցաբերել յուրաքանչյուրին:

Նախարարը նաեւ նշեց, որ իր ղեկավարած նախարարությունն ամեն ինչ անում է, որպեսզի տրանսպորտի գները շատ չբարձրանան: