Երեք ոլորտ, որոնք կարող են գրավիչ լինել օտարերկրյա ներդրողների համար

Այսօր լրագրողների հետ հանդիպեց Հայաստանի գործատուների միության նախագահ Գագիկ Մակարյանը` խոսելու ՀՀ վարչապետի հանձնարարականի մասին`  բիզնես ոլորտի խթանման համար ներդրումային ծրագրերի իրականացման հեռանկարների շուրջ:

Ըստ նրա` տեղական բիզնեսը Հայաստանում, իր ողջ պոտենցիալով հանդերձ, չունի տնտեսությունն արագ զարգացանելու կարողություններ, ուստի ներդրումների հարցը շատ կարևոր է: Իհարկե, վերջին 7-8 տարիներին Հայաստանում ներդրումների ծավալը գնալով նվազել է` անցյալ տարի գրանցելով ընդամենը 181 միլիոն դոլար, մինչդեռ տարեկան 1-1,5 միլիարդ դոլարի ներդրումներ պետք է ապահովել, որպեսզի տնտեսությունն արդիականացվի և աճ գրանցվի:

«Բայց դա լուրջ թիվ է, մենք կկարողանա՞նք 181 միլիոն դոլարը հասցնել 1,5 միլիարդ դոլարի: Իհարկե, կան ոլորտներ, որոնք կարող են գրավիչ լինել ներդրումների համար: Առաջին ոլորտը  գյուղատնտեսությունն է` այգիներ, ջերմոցներ, որոնք կնպաստեն գյուղատնտեսական ապրանքի լուրջ քանակի արտահանմանը Իրան, Ռուսաստան: Մյուսը էներգետիկ բնագավառն է, որտեղ հետաքրքիր ու ակտուալ են մնացել միայն քամու, արևի, ստորգետնյա տաք ջրերի ոլորտները: Երրորդ ոլորտը ՏՏ-ն է և ինժեներինգը»,- ասաց Գագիկ Մակարյանը:

Հայաստանը, ըստ նրա, ունի  ներդրումների առումով իր վրա դերակատարություն վերցնելու նախադրյալներ: Դրան նպաստող հանգամանքներից է Հայաստանի աշխարհագրական դիրքը` որպես կամուրջ երկիր Իրանի և Ռուսաստանի միջև: Կառավարությունը նույնպես իր ծրագրում կարևորում է ներդրումների խթանումը բոլոր միջոցներով` արդար մրցակցային պայմաններ, քաղաքացիության շնորհում, հակակոռուպցիոն քայլեր: Իհարկե, ներդրումներ գրավելու համար, ըստ Մակարյանի, Հայաստանում բացասական գործոնները ևս շատ են, օրինակ` բոլոր կարևոր շենքերը, անշարժ գույքը արդեն սեփականաշնորհված են, և օտարերկրյա ներդրողներին քիչ գրավիչ շենքեր  են մնացել` առաջարկելու: Հայաստանը դեռևս «փայլուն» դիրքեր ունի կոռումպացված լինելու առումով, որն ամենամեծ խոչընդոտներից մեկն է օտարերկրյա ներդրողների համար: Կառավարությունն այս ուղղությամբ մեծ անելիքներ ունի, քանի որ օտարերկրյա ներդրողը պետք է հստակ իմանա` ինչ միջավայրում է ինքը աշխատելու:

«Նման է մի բանի, որ ինտելիգենտ մարդուն տանես բանտ ու ստիպես շփվել այլ տեսակի մարդկանց հետ` ակնկալելով, որ նա մնա նույն ինտելիգենտ մարդը»,- օրինակ բերեց Մակարյանը:

Ըստ նրա` կառավարությունը պետք է կարողանա ճիշտ ներկայացնել Հայաստանը օտար երկրներին, որովհետև եվրոպական երկրներին շատ դժվար է ներկայացնել Հայաստանը և մոտիվացնել նրանց: