Բելառուսի և Ռուսաստանի հարաբերություններում սառնություն է գրանցվել. Независимая газета

Սպասվում է, որ վաղը կկայանան Բելառուսի նախագահ Ալեքսանդր Լուկաշենկոյի և Ռուսաստանի նախագահ Վլադիմիր Պուտինի բանակցությունները: Կողմերը կքննարկեն ինտեգրմանը խանգարող խնդիրները:

Փորձագետները, սակայն, հարաբերություններում որևէ առաջընթաց չեն ակնկալում ոչ միայն այդ հանդիպման արդյունքում, այլ նաև մոտ ապագայում. գրում  է Независимая газета-ն:

Նշվում է, որ օրերս ռուս լրագրողների հետ հանդիպման ժամանակ Ալեքսանդր Լուկաշենկոն բացասական է գնահատել հետխորհրդային տարածքում, այդ թվում` ԵՏՄ-ում ինտեգրացիոն գործընթացների ընթացքը: Նա քննադատել  է Ռուսաստանին՝ Բելառուսին նավթային կախվածության մեջ պահելու, հավասար իրավունքներից զրկելու համար: Տեղի դիտորդները կարծում են, որ ղեկավարները հանդիպման ընթացքում կլուծեն այդ խնդիրները:

Փորձագետները, սակայն, չեն կիսում նման լավատեսությունը: Շաբաթ օրը Ռազմավարական հետազոտությունների բելառուսական ինստիտուտը (BISS) հրապարակել է Բելառուսի վարած արտաքին քաղաքականության ինդեքսի 34-րդ թողարկումը: Վերլուծվել է այս տարվա սեպտեմբեր-հոկտեմբերին Մինսկի վարած արտաքին քաղաքականությունը: Պարզվել է, որ Ռուսաստանի հետ հարաբերություններում գրանցվել է «հարաբերությունների բարձր բացասական ինդեքս՝ մինուս 15 կետ»: BISS–ի փորձագետների համաձայն` նման ցուցանիշ արդեն վաղուց չէր գրանցվել:

Փոխարենը լավ են Բելառուսի հարաբերությունները Եվրամիության հետ. Եվրամիության երկրների և ինստիտուտների հետ վերսկսվել է բարձր դիվանագիտական ակտիվություն (+32 կետ):