3-րդ խոշոր ահաբեկչությունից հետո Էրդողանը դեռևս մտահոգվելու պատճառ չի տեսնում

Թուրքիայի մայրաքաղաք Անկարայում վերջին 5 ամիսների ընթացքում տեղի ունեցած 3-րդ ահաբեկչությունից հետո երկրի նախագահ Ռեջեփ Թայիփ Էրդողանը բարեհաճել է հայտարարությամբ հանդես գալ:

Ըստ Demokrathaber-ի՝ նա ցավակցել է զոհվածների ընտանիքներին, սակայն հայտնել, որ «մտահոգվելու կարիք չկա»:

«Թուրքիան, իհարկե, անցյալում է թողնելու այս դժվար օրերը: Մեր պետությունը երբեք չի վարանելու օգտագործել ահաբեկչության ցանկացած տեսակից պաշտպանվելու` իր իրավունքը: Մեր քաղաքացիները թող չմտահոգվեն: Ահաբեկչության դեմ մեր պետության՝ մղած պայքարը, ժողովրդի հետ համագործակցությամբ, հաջողությամբ է ավարտվելու, ահաբեկչությունը ծնկի է գալու»,- ասել է Թուրքիայի ղեկավարը:

Էրդողանի խոսքով՝ Թուրքիայի «ազիզ» ժողովուրդը նման հարձակումների ժամանակ ավելի հավաքական է դառնում: «Թուրքիան վերջին տարիներին տարածաշրջանում անկայունության արդյունքում դարձել է ահաբեկչական գործողությունների թիրախ: Ահաբեկչական կազմակերպությունները և իրենց պայքարում պարտության մատնվողները այդ կազմակերպություններին որպես «ամրակ» են օգտագործում, և անբարո ու անխիղճ գործողությունների զոհը դառնում են անմեղ մարդիկ»,- ասել է Էրդողանը՝ կրկնելով՝ «մտահոգության կարիք չկա»:

Թուրքիայի առաջնորդը նաև առողջություն է մաղթել պայթյունից տուժածներին: