Արարատի մարզին հատկացվելիք գումարը պակասել է

Արարատի մարզպետ Ռուբիկ Աբրահամյանն այսօր խորհրդարանում լրագրողներին տեղեկացրեց, թե 2017 թվականի բյուջեով, նախորդ տարվա համեմատությամբ, շուրջ 2 միլիոն դրամով պակաս ֆինանսավորում է  հատկացվել մարզին: Ըստ նրա՝ բյուջեով նախատեսված է մոտ 7. 659 միլիոն դրամ:

Հարցին, թե այդքան գումարը բավարա՞ր է մարզի խնդիրները լուծելու համար, մարզպետը պատասխանեց, թե կրթությունն է հիմնական խնդիրը, սակայն այս ոլորտում բավականին աճ ունեն:

Իսկ թե ինչո՞ւ են հատկացումները պակասել, մարզպետը պատասխանեց, որ էլեկտրաէներգիայի տնտեսում է եղել:

Հարցին, թե առաջարկվում է կրճատել փոխմարզպետերին, փոխնախարարներին, ինչպե՞ս է գնահատում այդ առաջարկը, Աբրահամյանը պատասխանեց, թե իրենք ևս պետք է արդյունավետությունը քննարկեն, հասկանան: «Որովհետև ամեն մեկն աշխատում է իր մասով,  աշխատանքը բաշխված է: Եթե ընդհանուր մոտեցումը լինի, բնական է` արդյունավետ պայմաններ պետք է ստեղծենք աշխատանքի համար»,- ասաց նա: