Վիրահատել ենք, եթե ստացվեր՝ կապրեր. բժիշկը՝ 17-օրական երեխայի մահվան մասին

Հայտնել ենք, որ նախօրեին «Սուրբ Աստվածամայր» ԲԿ-ում 17 օրական երեխա է մահացել: Ըստ «Փաստինֆո»-ի՝ երեխայի ծնողները համարում են, որ բժիշկների կողմից ոչ ճիշտ բուժօգնություն է ցուցաբերվել, ինչի հետևանքով էլ երեխան մահացել է:

Yerkir.am-ի հետ զրույցում «Սուրբ Աստվածամայր» ԲԿ-ի տնօրեն Նիկոլայ Դալլաքյանը հայտնեց, որ երեխան ծնվել է բնածին երկու ծանր՝ կյանքի հետ անհամատեղելի արատներով:

«Երեխան եղել է անհաս՝ 1 կգ 600 գրամ, ծնվել է ծանր շնչառական անբավարարությունով ՝ պայմանավորված թոքերի թերզարգացմամբ, կերակրափողի մի ծայրը փակ է եղել, ստամոքս գնացող հատվածը միացված է եղել շնչափողին: Վիրահատել ենք, եթե ստացվեր՝ կապրեր, բայց նման բարդություններով ծնված երեխան չի կարողացել պայքարել՝ արդյունքում մահացել է»,-ասաց նա՝ նշելով, որ եթե անգամ երեխային չվիրահատեին, միևնույն է՝ մահանալու էր:

Դալաքյանը հայտնեց, որ ծնողները երեխային վիրահատելու գրավոր համաձայնություն են տվել՝ ստորագրել, և որ առաջին իսկ պահից տեղյակ էին, որ փրկվելու շանսն աննշան էր:

«Պարզ է, ամեն ծնող դժգոհ է, բայց մեր բժիշկներն օր ու գիշեր աշխատել են , 17 օր պայքարել փոքրիկի կյանքը փրկելու համար, ինչը, ցավոք, չի ստացվել»,-ասաց նա:

Մանկական վիրաբույժի խոսքով՝ իրենց հիվանդանոցում տարեկան մոտ 10.000 հիվանդ երեխա է ընդունվում, որոնցից 70-100–ը մահանում: Ընդ որում՝ մահվան դեպքերի մեծ մասը պայմանավորված է բնածին արատներով: