Նոր մոտեցումների կարիք կա. Շարմազանովը՝ Սուրիկ Խաչատրյանի պաշտոնանկության մասին

ԱԺ փոխխոսնակ Էդուարդ Շարմազանովն այսօր խորհրդարանում լրագրողների հետ զրույցում անդրադարձավ Սուրիկ Խաչատրյանի պաշտոնանկության պատճառներին: «Նոր մոտեցումների, նոր պատճառների, նոր փիլիսոփայության, նոր մարտահրավերների կարիք կա»,- ասաց նա:

Yerkir.am-ի հարցին, թե Սուրիկ Խաչատրյանը չէ՞ր համապատասխանում այդ նոր մոտեցումներին, Շարմազանովը պատասխանեց. «Նոր մոտեցումներին համապատասխանելու խնդիրը չէ, կարիք կա նոր, թարմ աշխատանքի՝ նոր թիմով: Այդ մասին խոսել է հանրապետության նախագահը՝ դեռևս փետրվարի 12-ին: Այսօր, բացի Սուրիկ Խաչատրյանից, այլ լուրջ կադրային փոփոխություններ են եղել կառավարության կազմում և դեռևս կլինեն, և ես ասել եմ, որ փոփոխություններ կլինեն նաև մեր ղեկավար մարմնի կազմում` գործադիրի կազմում: Փոփոխությունը բնականոն պրոցես է, պետք չէ զարմանալ»:

Դիտարկմանը, թե ասում են՝ Կարեն Կարապետյանի կամքն է, որ Սուրիկ Խաչատրյանը պաշտոնանկ եղավ, Շարմազանովը պատասխանեց. «Այս աշխարհում ինչ  լինում է, առաջինը լինում է Աստծո կամքով, բայց նաև` վարչապետի: Նախագահի առաջնահերթությունն է եղել փոփոխություններ կատարելը: Դուք տեսաք, որ լուրջ փոփոխություններ տեղի ունեցան, և դրանք պայմանավորված չեն միայն անձերով: Սկսել ենք ավելի արդյունավետ աշխատել»: